Dr. John Hlychho (Times of Mizoram Pathianthuchah)~Dr. John Hlychho

1. THUHMAHRUAI

November 30, 2013-a American Actor hmelţha leh lâr tak Paul Walker thihna chuan khawvêl a ţhawng hle mai a. Entertainment khawvêla tui mi leh inhnamhnawihte rilru a khawih-in, an tân chânna râpthlâk tak a ni.

Kha thihna râpthlâk tak kha eng vânga thleng ta mai nge tih an chhui chian chuan Paul Walker ţhianpa Roger Rodas khân an chuanna Car kha a khalh chak lutuk a (at least 90-100 mp/h or 160 km/h), a thunun zo tawh lova kawngsira thing ding chu su-in a alh zui nghal a, a chuangte chu kâ pawh chhawn lovin a hmunah an thi nghal niin an sawi a ni.
A tawi zâwngin an tlân chak lutuk a, an fimkhur tâwk lova accident râpthlâk tak an tâwk ta a ni.
Chhui mite chuan Lirthei (Car, Bike etc.) khalhtu, (amah felloh vâng emaw, fimkhur tâwk loh vâng emaw ni lova) a tar-kun thlenga tawhsual (accident) tâwk miah lova khalh thei-te chu, “mi fimkhur tâwp, mi rintlâk leh in-nghahna tlâk an ni e” an ti!
He zirchianna-in a târlan duh ber chu, Lirthei hmanga chetsualnaah hian khalh chak lutuk ringawt hi chhiatna chhan ber a ni mai lova, a muang emaw, a chak emaw, fimkhur tâwk lohna hi chhiatna chhan ber chu a ni zâwk a ni, tih hi a ni.

2. JUDA LAL HEZEKIA A KAL FÎMKHUR TÂWK LO

Juda Lal Hezekia hi Pathianin malsawmna leh hlawhtlinna nasa takin a vûr a (2Lal.20:1-11. 2Chro.32:24-33, Isa.38:1-22). Pathian ropui nân leh Israel fate tân Thil ţha tam tak a ti a. Mahse, mite hriat lohvin a Chapo a, Pathian Duhdân kalh-in thil a ti tlat mai!

Miten Hezekia sualna leh chapona chu hmu lo mahse, Pathian chuan thil inthup engkim a hmu tlang vek si! Pathianin a sualna chu hrêm lohvin a chhuah thei si lo! A hrêm a ngai ta tlat mai!
Lal Hezekia Sualna-te hi – (1). Chapona (v.27-30)– A thiltih ţhat-te a chhuang a, a chapo-pui. (2). A Hlawhtlinnaah Pathian a Theihnghilh (v.30)- A thiltih engkima a hlawhtlinna chu Pathian pêk a ni tih a theihnghilh a, ama tih theih ve rêng-ah a ngai. (3). Babylon Lal hnênah Pathian Thiltihtheihna Thurûk a hrilh (v.31).

3. KRISTIAN KAL FÎMKHUR HLAUHAWM A HNAI!

Kan khawvêl hun hman mêk hi a changkâng tawh a. Space Age, Computer Age leh Digital Age kan pêl a, tunah chuan Face Book Age ah kan awm tawh a! Kan thiltih engkim mai hi kan Hmai-hmâ (Right Now/Right on the Face)-ah ngei kan hmu zung zung a, miten min hmu zung zung tawh bawk a ni.

Inthûp emaw, thûp-bo emaw a theih loh! Kan chunga thil-thleng-te chu second tin-in a lem (photo) leh a video-in khawvêl hmun tin aţanga hmuh theihin kan lang nghal zêl thei tawh a ni.
Nimin lawk December 30, 2015-ah khân, Țhian Pakhat chuan, “Tun Christmas chho vêl khân kan Damdawi Dâwr ka nghâk ve ţhin a. Dr XXX (Viagara), Condom leh Hmeichhia-te rai lohna (emergency contraceptive) kan va hralh thei nasa êm! Hmeichhe pakhat phei kha chuan, “Tui in tur in nei em?” tih pah khân Mum 1 chu an dawlh nghal pawp a….” tiin, Aizawla khawpuia thilthleng ngei a sawi nghe nghe a ni.
Nuam rei lo-te chênin, damchhungin hrêhawm an tuar thung tur ngaihtuahin rilru an tinâ ngawih ngawih a ni.
Lal Hezekia khân Pathian ropuina tura thil a tih tam êm avangin, a chapona leh sualna hi Bible hian sawi lang ta lo se, kan hre khêr awm lo ve! Lal Hezekia chungchang hi Bible-ah hmun 3-ah a lang a, heng zingah hian 2Chro.32:24-33 thu hi nei lo phei ila, a chiang lo lehzual ngei ang.
Helai thu hian, Bible hi Bung 1 emaw, Châng 1 chauh emaw hmanga kan Duhzawnga keuh-thlûk vak chi a ni lova, Bible Bu dangah, Châng dangah Engtin nge a inziah? tih en-tel fo a ţulzia a rawn tichiang nghal awm e.
Kan nun-a sual leh fellohna, Pathian duhzawng kalhtu leh Thlarau Thianghlim tivui ţhintute hi mi chuan min hriatpui lo mai thei, keimahni ngei pawhin kan inhre thei lo mai thei! Kawng leh lamah thung chuan, thudik tak inzep awm tel ve chu, mahni fellohna hi inhmu lovin, inhre thei lo mahila miten an hmu a, an hria a. Chutiang bawkin, miten a rûka kan sualna an hriat loh chu keimahni’n kan inhre êm êm thung bawk (kan sawichhuak duh lo mai thei).

4. ZAWI TÊ-IN, FÎMKHUR TAKIN, I KAL DÊM DÊM TAWH ANG AW

A Thiltih sual a hriat chian hnu chuan, Lal Hezekia chuan dik taka Inpuangin, Inhlan Tharna leh Inpêk Tharna neiin, “Engnge ka sawi ang aw! Ani chuan mi bia a, Ani vêk chuan a ti ta nghal a: Ka nunna thawpîkna avâng khân ka dam chhûng kum zawng zawngah chuan zawi tê-in ka kal dêm dêm tawh ang” (Isaia 38:15) tiin Pathian hnênah thu a tiam thar leh a ni.

Ringtute hi Vânram pana kan kal lai hian, inpaltlûk theihna tur hlauhawm a tam êm êm a. Fakna Hla siamtu chuan, “Krisţian kal fimkhur rawh, hlauhawm a hnai, thlêmtu a hnai, Setana thlêmnain i vêl a dâp, Setana hneh nân i Lalpa dil rawh” a lo ti hial a.
Kal chak lutuk te, kal muan lutuk te, nun fimkhur loh avânga suala tlûk te, mahni chhiatna tura thiltih leh midangte chhiatna tur thiltih palh a awl êm êm a ni.
Chuvângin, Lal Hezekia ang hian, ringtuten, nun ulûk tak leh fimkhur takin, thlêmna tinah him taka kan kal theih nân, he Kum Thar 2018-ah hian Lalpa hnênah dil a, ţawngţai fova, Lalpa beisei zêl chungin, zawi tê-a kal dêm dêm-in kan Vânram in kawng nuam tak hi i zawh zel ang u.

Post a comment

Powered by Blogger.