Champhai North bialtu MLA TT Zothansanga chuan January 6, Inrinni khan Champhai Press Club-ah thuthar thehdarhtute a kâwm a; Champhai Keilungliah lui khuah dan tur a sawifiah.
TT Zothansanga chuan, Keilungliah lui hi Non-Lapsable Central Pool of Resources (NLCPR) sum nuai 1,988 sengin khuah a nih tur thu sawiin, PHE department hmalakna a nih thu leh sum hman tur pawh sorkar laipuiin a pek tawh thu a sawi.
MLA chuan, tuikhuah chu Champhai leilet zâwl châwmna tura tui dahkhawlna châwmtu tur a nih dawn thu te, Champhai boruak ro lutuk tihnáwngtu tura duan thu te, hun âwla mipui intihhlimna leh hahchawlhna tur a nih thu te, Champhai khawpui cheina pakhat a nih dawn thu leh sangha khawina hmun atan hman a nih dawn thute a sawi bawk.
TT Zothansanga sawi danin, tuikhuah sân zawng chu metre 22 a ni ang a, metre 4-a sanga khuah belh leh theih tura duan a ni. A bang chhah zawng chu metre 14 a ni dawn a, tuikhuah kotlang chu metre 4-a zau tur niin, lirthei tlân theih tura siam a ni ang. Tuikhuahin ram square metre 35,00,000-a zau a chîm dawn a, tui cubic meter 24,00,000 a tling thei dawn a ni.
Tuikhuah hual chhuakin kawngpui metre 4-a zau laih tur a ni a, survey leh investigation atan hman nghal turin Rs. 10,00,000 hmuh a ni tawh a, sorkar kum kal mek chhungin tender chhuah tum niin, tuikhuah hna chu kum thum chhunga zawh tum a ni. -Vanglaini
Post a Comment