Mizoram Ministerial Service Asso­ciation (MMSA) chuan nimin khan Lal Thanhawla Auditorium-ah inkhawmpui a an hmang a; khuallian, chief minister Lal Thanhawla chuan, sorkar hnathawk te'n chhiat ni ṭhat ni vangin an hna tiṭhuan­­awp lo se a duh thu a sawi. 
Lal Thanhawla  Lal Thanhawla


MMSA inkhawpui hi an president Lalremsiama'n a kaihruai a; Chief Minister chuan, "Kan hnam kalphungah chhiat ni ṭhat nia inṭawiawm ṭhin kan ni a, hei hi a thlamuanthlak rualin, sorkar hnathawkte chu kan phungthlûkna hian kan hna tiṭhuanawp lo se," a ti.

Sorkar hnathawk ṭhenkhat zingah ngaih­tuahna leh remhriatna ṭha tak tak nei an awm thu sawiin CM Hawla chuan, "An thiamna leh hlawh phu tâwka hna thawk tura an hotute'n an chhawr si loh an awm a ni," a ti a; hmasawnna turin kalphung thlak thiam zel a pawimawh thu a sawi.

Lal Thanhawla chuan, sorkar hnathawkte chu mipui rawngbawltu an nih angin mipui tan leh anmahni dâwrtute tan dâwr nuam taka awm tur an nih thu a sawi a; sorkar langtlang leh thawk ṭha siam turin rinawmna, dikna, taimakna leh Pathian ṭihna nen mahni hna ṭheuhah thawk turin kalkhawmte a chah.

Chief Minister chuan, rawngbawltu rilru pûa hna thawkte chu sorkar leh mipui tana ṭangkai ber an nih thu sawiin, "Tunlai khawvel changkang zelah hnathawhnaa computer thiam a pawimawh tak êm avangin a thiam lote pawhin thawktu hman tlak loh an nih mai loh nan inzir ve a, intahhriam tum tur ni," a ti.

Inkhawmpuiah hian MMSA member-te chuan an vice president Lalnghinglova kaihhruaina hnuaiah mahni hnaa rinawm leh ṭha taka thawk tura thu intiamna thu an sawi rual a ni.

Chawhnu lamah hruaitu thar thlan leh rorel inkhawm an buatsaih a, an rorel zingah assistant leh LDC hlawh tisang tura nawr chhunzawm te, MMSA hnuaia service hrang hrangte non-functional upgradation pek chungchang leh, sokar hnathawk hlawh chungchanga sorkar hnathawkte hmuh dik lohna awm fo chu sawifiahna tihchhuah chungchangte a tel a ni. -Vanglaini

Post a Comment

Powered by Blogger.