DONALD TRUMP-AN KIM JONG-UN A HLAU LO TEIH TEIH : NORTH KOREA-IN MISSILE LIAN BER TUR A TUK LEH TAN TA


khawvel chanchinthar chi hrang hrang indopui
January 3, 2018(MSR): North Korea Supreme leader Kim Jong-un chuan New Year’s Day thuchah a sawiah, a dawhkanah nuclear forces kahchhuahna tur hmeh khep (button) vuah fel a ni tawh thusawiin, US a vau khar khar a! US President Donald Trump chuan Kim Jong-un thusawi chu Twitter atanga chhangletin, “Kim Jong-un chuan a dawhkanah Nuclear Button a nei tih a puang a. Khawngaihin ei tur tlachham leh chaw tama rilramte khan lo hrilh teh u. Kei pawhin Nuclear Button chu ka nei a, mahse, ka neih chu an lian zawk fe in, a chakin thil a ti thei zawk daih a ni. Ka hmehkhep (button) chuan hna a thawk tha teh a nia!” a ti.


CT Lalrinawma - International News & Politics - Mizo Special Report

North Korea hian kumin 2018 chhovah missile test leh a tum tih US military official te chuan an sawi a, he missile enchhin tum hi ballistic missile a ni dawn niin, NBC News an hrilh.
Nikky Haley, US Ambassador to UN chuan UN Hqrs, New York ah reporters hnenah, “North Korea in missile test leh a tum tih kan lo hria. A thlen loh ka beisei. A lo thleng a nih ngai chuan nasa zawk (tougher measures) in North Korea chu kan hrek dawn a ni” a ti. President Trumpuia chuan, “A thleng lo vang!” (it won’t happen!) a ti bawk.
North Korea chuan Feb thlaa South Korea hmuna Winter Olympics lo awm turah infiam mite tirh a tum a, US Senator lar leh thiltithei, hawkish Republican, South Carolina state a mi Lindsey Graham chuan, “North Korea-in infiam mite a rawn tirh chuan US-in Winter Olympics chu a boycott mai thei a ni” tiin, a vaukhan nghal.
January 9 khian South Korea Reunification Minister chuan NKorea leh SKorea inrina Pamujon ah inbiakna an nei dawn a ni. South Korea President. Oo. jae-in chuan North Korean infiam mite chu Winter Olympics a tel turin a sawm a ni. US berin Winter Olympic a boycott a nih chuan kum 1988 a Summer Olympics a North Korea a tel duhlo ang kha a ni thei dawn a ni.



KIM JONG-UN THAT TUR AN RUAT TA

South Korea military te chuan “elite hit man” an din a, chungho chuan Kim Jong-un phil theih dan tur an ngaihtuah ber a ni. He Squad team te hi mi 2,000 dawn niin “Decapitation Unit” tih an ni a, “Special Mission. Rigade” ti pawhin an ko bawk thin. He Commando Team hi kum 2017 atanga din chhoh a ni. US lam pawhin CIA Hqrs Langley, Virginia state ah Kim Jong-un leh a nuclear forces atana hmalak chho dan chhuibingtu a lo din tawh bawk.
Lee Il-loo, Seoul based Korea Defense Network chuan, South Korea tan Kim Jong-un thah tum emaw man tum chu khirh tak a ni ang. Pyongyang khawpui, NKorea a thlawk lut thuta Kim Jong-un zawng tura chet tlat chu tihawm leh harsa tak a ni dawn a ni. Chuti maia kawng awlsam a ni hauh dawn lo. Mi 300 lek a huhova phura hniam tea thlawk tur chi (low altitude infiltration transportation) chu South Korea in thlawhna a la neilo a ni, a ti.

Jang Young=guen, Adviser of SKorea Defense Ministry chuan, “Heng “Decapitation Squad” te hian Pyongyang an lut a nih chuan North Korea sipaite chuan an lo tingmit (wipe-out) ngei ang. US meuh pawhin kum 11 zet Osama bin Laden chu man leh thah tumin an zawng a ni” a ti.
November thla 2017 khan US sipai lalber, Chairman, Joint Chiefs of Staff chuan, “North Korea nuclear & missiles te tichhe vek turin, van boruakah chauh ni lovin lei lamatangin beih (ground invasion) a tul a ni” a ti.

North Korea chuan Guam thliarkar chu missile a kahah a vau reng a, hemi vangin US Pacific military & naval base awmna Guam ah khualzin an tlem phah hle. Kumin 2018 kum tir chuan kum 2017 kum tir a tluk pha lo hle a ni, a ti. Kuminah (October 2017 atangin) khualzin 40,000 chauh an awm rih a ni. Japanese leh Korean hoten Guam hi kum 2016 ah khan an tlawh nasa a, mi maktaduai 1.56 zetin Guam thliarkar hi an tlawh (visit) a ni.
October 2017 khan Japanese 34,489 chauhvin Guam an tlawh a kum hmasa 2016 ahJapanese mi 55,636 laiin an tlawh a ni. Delta Airlines chuan Japan leh Narita atanga Guam tum tur a tirh thin chu passengers an tam lutuk loh avangin a cancel dawn bawk.



Global Crisis Group an tih, khawvela harsatna lo thleng thei tur leh awm thei tur zirbingmi te chuan, kum 2018 ah hian US chuan khawvel a lo hneh (influence) thin boruak a tlahniam zual ang, a ti. George W.Bush duhdana rorelna khauh lutuk (too aggresively) vangin, US chuan khawvel a hnehna boruak a tlahniam chho bawk, an ti. He Glibal Crisis Group-Eurasia Group te hi “ a political risk consultancy firm” an ni a, “Donald Trump a hmalak dan chu hrilhlawk fuh harsa (unpredictable) tak a ni ang” an ti bawk.

Kim Jong-un chuan Dec 11-12 khan a Rocket scientists rualte chu Pyongyang khawpuiah meeting neih puii, Hermit Kingdom “North Korea” kum 70 tlin lawmnaa kah chhuah turin ballistic missile/ rocket lian ber chher turin a hriattir a, Sept 9, 2018 ah kah chhuah tur a ni ang. North Korea dintupa a pu duh tak Kim Il-sung a hriatrengna ni pahin, an tum anga an awm chuan an kap chhuak leh dur dawn a ni.
Rocket pawh “Unha-3” aia lian zawk “Unha-4” tih an chher ang, tiin Asahi Shinbum (Japan) chanchinbu chuan a ziak. Unha-3 te hi 2012 leh 2016 ah orbit ah a lo kapchho ve vawn vawn tawh a ni. Inter-Continental Ballistic Missile (ICBM) Hwasong-15 chu Nov 2017 khan a lo kap chhuak tawh bawk a ni.

CT Lalrinawma - International News & Politics - Mizo Special Report

Post a comment

Powered by Blogger.