GOVT. MIDDLE SCHOOL ELECTRIC VENG GOLDEN JUBILEE LAWM
mizo jubilee lawmna hun hmang

Vawiin khan Government Middle School Electric Veng  Golden Jubilee lawmna Electric Veng YMA Hall-ah hman a ni a. He hunah hian School Education Minister Pu H. Rohluna chu khualllian a ni a, Khualzahawm Health Minister leh bialtu MLA nibawk Pu Lal Thanzara chuan Golden Jubilee souvenir tlangzarh nghalin Pu K. Sangthuama MLA pawhin hun hi a hmanpui a  ni.


School Education Minister Pu H. Rohluna chuan thu sawiin ram hmasawnna atan zirna chu thil pawimawh em em thlahthlam thianglo anih thu leh sum harsa tak chung pawhin sawrkarin zirna hmasawnna tur anih chuan theihtawpa hma a lak zel thu a sawi a. Minister chuan zirna hmasawnna atana hmalakna te sawiin tun dinhmunah Middle School leh a hnuailam chuan NCERT textbook an hman vek tawh thu leh kumin atang chuan Middle school English medium a kalpui vek anih tawh tur thu a sawi bawk a. Zirlai ten science leh mathematics ahte harsatna an tawh lohnan Middle School leh High School-ah heng subject zirtirtu bik tur teacher lak annih thu a sawi bawk a. Government School that leh thatloh chungchangah Headmaster te leh zirtirtu te an pawimawh thu sawiin zirtirtu tha tak tak la thalai zawkte Headmaster annih ve theihna turin Headmaster Recruitment rules siamthat anih thu leh tunah chuan sanctioned post-a a chanve chu promotion niin a chanve dang chu exam (LDE) atanga kaisan theih anih tawh thu a sawi bawk a.  Education Minister chuan Govt. Middle School Electric veng in kum 50 a tlin chu a lawmpui thu a sawi a, mahni theihna zawn theuhah zirna siam tha tur leh zirnain hma a sawn zel theihna tura thawhho puiah Golden Jubilee lawma kalkhawm mipuite a sawm nghal a ni. Education Minister hian Golden Jubilee lawmpuina atan Computer a pe bawk a ni.


Khual zahawm Health Minister leh Bialtu MLA nibawk Pu Lal Thanzara chuan Govt. Middle School Electric veng in kum 50 chhunga naupangte hnena zirna tha pe a ram leh hnam tana mi tangkai leh mithiam tak tak a alo chherchhuak tawh thin chu lawmawm a tih thu sawiin thlen china duhtawk mai lova tun aia nasa lehzuala tan laa zirlai leh zirtirtute thawhrah chhuanawm tak hmuh tur a awm zel a beisei thu a sawi bawk a ni. Pu Lal Thanzara chuan zirna in hlutzia sawiin Ram leh Hnam hmasawnna kailawn pawimawh berte zinga pakhat chu zirna hi a ni, a ti a. Tunhmaa zirtirtute thahnemngaihna leh taimakna, zirtirtu pakhatin school pakhat  a enkawl lai pawha naupangte an hlawh tlinpui thinzia leh ram tana mi chhuanawm tak tak an chher chhuah thin thu sawiin tuna zirlai leh zirtirtu te pawhin theihtawp chhuaha nasa lehzuala hmasawnna a awm theih nana thawk turin a fuih a ni.

Golden Jubilee lawmna inkhawm hi Pu R. Biakzama Headmaster (rtd) chuan kaihruaiin Pu Lallungmuana Headmaster, Secretary Organising Committee hnen atangin report kimchang ngaihthlak a ni bawk a. Pu K. Sangthuama MLA pawhin thu sawiin Zirna in a tum ber chu naupangte puitling chhawrtlaka chherchhuah anih angin Govt. Middle School Electric veng chuan hemi kawngah hlawhtlinna nasa tak a neih thu a sawi a. Tlai lamah Golden Jubilee ruai thehin an lawm zui a ni.

Govt. Middle School Electric veng hi kum 1968 ah headmaster leh zirtirtu pathum neiin din a ni a, tun dinhmunah zirlai 76 leh zirtirtu 13 an awm mek a ni.-DIPR

Post a comment

Powered by Blogger.