HRANGTURZO CLUSTER AH HORTICULTURE TRADE HNUAIA NLUP FINAL INSTALMENT SEM


HRANGTURZO CHANCHINTHAR - TUALCHHUNG CHANCHIN THAR BERHRANGTURZO CHANCHINTHAR: Nimin khan E. Lungdara Thangburha Hall ah Hrangturzo Cluster a Horticulture Department hnuaia NLUP trade hrang hrang thlangtute hnenah Final Instalment hlanna hun buatsaih a ni a. He hunah hian Nl. Vanlalawmpuii Chawngthu, Minister of State leh bialtu MLA ni bawk chu khuallian niin Pu KS Thanga, Minister of State, Agriculture chu khualzahawm a ni.

Khuallian Nl. Vanlalawmpuii Chawngthu chuan, Hrangturzo bial mipuite chu mi taima leh thawkrim tak nia a hriat thu sawiin chhuanawm a tih thu a sawi a. NLUP pawh hlawhtlin pui tam tak an awm thu sawiin, vawiina 3rd & 4th Phase an semchhuah leh pawh a dawngtuten tangkai taka an hman ngei a beisei thu a sawi. Mi harsa zawkten lei rem an raha, bul an tanna tur tanpuina a nih ang ngeiin a nihna tur ang taka hmang a, hlawhtlinpui ngei turin vawiina NLUP dawngtute hi a chah a ni. Tin, NLUP pawh hmalak chhunzawm zel tur a nih thu a sawi bawk. Khuallian hian, sawrkar in hlawhtlin tuma bei tak taktute tan ruahmanna thar a siam thu sawiin New Economic Development Policy chungchang a sawi a.  Kawng hrang hrangin mipuiten hlawhtlinna an chan ngei theih nan sawrkar chuan a bei, a bei chhunzawm zel dawn a ni, a ti.


HRANGTURZO CHANCHINTHAR: Khualzahawm pu KS Thanga pawhin thusawiin, Cluster pakhat chhunga Department pakhat chauh hnuaia chhungkua heti zatin NLUP tanpuina an dawng thei chu a lawmpui thu a sawi a. Lungdar leh a chhehvel chu Serthlum tharchhuah tamna hmun a nih avangin, a phu pawh in phu hle ani, a ti. NLUP chu kalpui chhunzawm zel a nih tur thu sawiin hun reiloteah hmalak chhunzawm thuai a nih tur thu a sawi a. NLUP atang thawh mai remchang lo, loneitute mamawh intawm tam tak, mimal tana tih mai theih loh hna hrang hrang thawhna tur NEDP kalpui a nih thu pawh sawiin tunah hian NEDP atang hian khaw hrang hrang tana Agriculture Link Road engemawzat kan lai dawn a ni, a ti a. Leilet zau hrang hrangte tana Tractor, Custom Hiring hmang kan lo pek tawh pawh pek chhunzawm zek turin ruahmanna kalpui a ni bawk, a ti a. Kuthnathawktute tan sawrkar chuan theihtawp a chhuah zel dawn a ni, tiin NLUP dawng tura kalkhawm te a chah a ni.

NLUP hlanna inkhawm hi Pi Margaret Vanlalzami, DHO Serchhip chuan kaihruaiin Pu Manthanga Tochhawng, HEO, Serchhip Division chuan Technical Report a pe. Report a a lan danin NLUP an semchhuah hi 3rd Phase hnuaiah chhungkaw 299, khaw hrang hrang 11 a mite hnenah niin he phase atanga semchhuah hi Rs. 1,22,85,526 a ni. Tin, 4th phase hnuai ah chhungkaw 142, khaw hrang hrang 11 a mite hnenah pek ni bawkin he phase hnuaia pawisa sem zat hi Rs. 63,83,148 a ni bawk. NLUP semchhuah zawng zawng hi Rs.Rs. 1,86,68,674 niin khaw 11 a chhungkaw 441 ten an dawng a ni.


HRANGTURZO CHANCHINTHAR: NLUP Horticulture Department, Hrangturzo Cluster chhung khaw hrang hrang atanga 3rd phase atanga dawng zat chu hetiang hi a ni: E. Lungdar ah chhungkaw 85, Biate ah chhungkaw 65, Mualchengah 22, Leng ah 27, Sailulak 13, Bawktlang 8, Lungchhuan 13, Lungkawlh 13, N. Vanlaiphai 45, Sialsir ah 7 leh Chekawnah chhungkaw 1, an vaiin chhungkaw 299 an ni a. NLUP 4th Phase hnuai dawngtute chu: Lungdar ah chhungkaw 28, Biate ah 24, Mualcheng ah 11, Leng ah 16, Sailulak 5, Bawktlang 5, Lungchhuan 10, Lungkawlh 3, N. Vanlaiphai 32, Sialsir 6 leh Chekawn ah chhungkaw 2 niin an vaiin chhungkaw 142 te an ni. 

He hunah hian Pu H. Laltana, VCP, E. Lungdar leh Pu R. Vanlalsiama, Biate ten NLUP dawngtute aiawhin thusawina hun an hmang a, Nl. Lancy Remlalhruaiin zaiin kalkawmte a awi bawk.

Pi Vanlalawmpuii Chawngthu leh Pu KS Thanga te hi Serchhip atangin Pu James Lalsiamliana, DAO leh Pu. K. Saitluanga, IPRO ten an tawiawm a. E. Lungdar BDO Pu. Vanlaltanpuia leh E. Lungdara sawrkar mi pawimawhte, khawtlang hruaituten an lo dawngsawng a ni.

Nl. Vanlalawmpuii Chawngthu leh Pu KS Thanga te hian Khawlailung leh Mualcheng khawtlang hruaitute nena inkawmna hun an hmang nghal bawk.-DIPR

Post a Comment

Powered by Blogger.