LUNGLEI TUALCHHUNG CHANCHIN -PIANG LEH THI CHHINCHHIAH CHUNGCHANG ZIR HO - TIMES OF MIZORAM

Breaking

Home Top Ad

Post Top Ad

LUNGLEI TUALCHHUNG CHANCHIN -PIANG LEH THI CHHINCHHIAH CHUNGCHANG ZIR HO

PIANG LEH THI CHHINCHHIAH CHUNGCHANG LUNGLEI-AH ZIR HO


LUNGLEI TUALCHHUNG CHANCHINLunglei Tualchhung Chanchin: Vawiin chawhma khan Convention Center, Lunglei-ah Economics and Statistics Department buatsaihin Lunglei District huamchhunga piang leh thi chhinchhiahtu Registrar-te intuaitharna “Annual Training on Registration of Births and Deaths” neih a ni a. Lunglei Deputy Commissioner Pi Lalzarmawii, IAS chuan khuallian niin a hmanpui.

He training hi kum tin buatsaih thin niin nimin khan DRO office –ah RBD ten piang leh thi an chhinchhiahna register leh receipt te endikna hna kalpui a nih bakah kumthar atana an hmanraw mamawh te sem chhuah an ni. Vawiin training-ah hian RBD ten an thil hriat tur pawimawh hrang hrang zirho leh sawihona hun an hmang a ni.


Vawiin programme Lunglei DRO Pu C. Vanlalmuana kaihhruaiah hian Pi Lalzarmawii chuan Annual training changtlung taka buatsaihtute leh RBD thahnem tak kalkhawmte chungah lawmthu a sawi a. Piang leh thi chhinchhiah pawimawh zia sawiin ramchhung State tin ten sawrkar laipuia thla tin an Register thehluh thin chu UNO-ah theh luh leh niin khawvel ram tina sawrkarin mahni ram chhung hriselna kawng ruahmanna siam nan an hmang tangkai em em a ni, a ti. Mizoram State chhunga piang nilo te piang anga register an awmloh nan RBD ten an hna fimkhur leh rinawm taka an kalpui a tul a ni tiin  Lungei DC chuan RBD kalkhawmte chu an hna a pawimawh zia hre thar leh turin a fuih a. Piang leh thi te uluk taka chhinchhiah vek tur a nih avangin chhungkaw tin ten mawhphurhna pawimawh tak an nei theuh a ni, a ti bawk.

PIANG LEH THI CHHINCHHIAH CHUNGCHANG LUNGLEI-AH ZIR HO

He hunah hian Pu R. Malsawmdawngzuala, 1st class Judicial Magistrate leh Pi C. Lalthanmawii, RO, Directorate of Economics & Statistics ten thu sawiin RBD te hriattur pawimawh hrang hrang an sawi lang. Chawhnu lamah Technical Session neih niin Pu C.Lalhmangiaha, SIS in kalkhawmte zirtirna a pe.

Piang leh thi chhinchhiah hi Mizoramah kum 1985 atanga kalpui tan niin tun dinhmunah Lunglei District-ah piang leh thi chhinchhiahtu (RBD) 166 an awm a. Pian leh thih atanga ni 21 chhunga in report te tan Registration leh Certificate man engmah chawi ngai a awmlo. He ni 21 ral hnua in report te tan Late fee leh Certificate pekchhuah man chawi a ngai a. Chhungkaw zingah Baptisma chang tur emaw nau hlan tur an awmin an Birth Certificate mil thlapa an pianni leh thla te, nu leh pa hming te ziah tur a ni. Pianni atanga chhuta kum khat hnu lama Birth Certificatr dil duhte chuan Magistrate phalna hmang chauhin Registration an dil thei a ni.-DIPR

Post Bottom Ad