MINISTER HOVIN PWD HNATHAWHTE THLIRHONA NEIH A NI
![Mizoram Public Works Department Chanchinthar PWD Mizoram](https://blogger.googleusercontent.com/img/b/R29vZ2xl/AVvXsEihQNI0Mq8BfFB-Ojjo5jTlY20zMzTFqe5yIjHt1RW3Nm3XCm2q6hlHaJSFZkBwpTeDz8ScgejQ7R1-PuLFQ3xLfnvLjsbN9l4nY_DX7GzH_yv4V8eIkknxDMjemFvZn61paFWUc3CzEIs/s200/mizoram+public+works+department.gif)
PWD Minister Pu Lal Thanzara chuan thu sawiin nikumah kum dang zawng aia nasa in ruahtui a tam a, chu chuan department hnathawh pawh a ti khaihlak hle a ni, a ti a. Thawhhona tha chuan hnathawh pawh a ti sawt zawk a ni tiin kalkhawmte hnenah chuan in thiamnate in hman tangkai a ngai a ni, a ti a. Hmun hrang hranga PWD hnathawhna kawnga harsatnate Minister chuan sawiin heng harsatna chin fel a nih theih dan te a tarlang a. Tui luanna tur tha neih a pawimawh thu sawiin tui luanna tur bawlhhlawh leh thil dangin a hnawh khat thin chu titawp tura tan lak a ngai a ni, a ti a. Kawngpui tha siam pawhin tui luanna ber tur a awm that loh chuan kawngpui pawh a tha rei thei lo a ni, a ti a. Kawng chhelai thuamthat chungchangah pawh a rang thei ang bera hnathawk turin a chah a. Social Media chak tak kan neih hi department hmalakna hrang hrang mipui vantlangin an hriat theih nan hman theih a ni tiin mipui lam atanga zawhna awm te hrilhfiahna atan kan hmang thei bawk a ni, a ti a. Thahnemngai taka hnathawk turin kalkhawmte chu a fuih bawk a ni.
PWD Principal Secretary Pu Lalram Thanga, IFS chuan kalkhawmte lawmna thu a sawi a. Kumin 2018 hi inpekna thar nen kum bul tan I tum ang u tiin a hun taka office kal leh haw pawimawhna I hre thar leh theuh ang u, a ti a. Meeting-a kan rel te hi kan bawhzui tha tur a ni tiin work site tlawh leh inspection kan uar a ngai a ni, a ti a. Engineer-In-Chief Pu R. Vanlaltluanga pawhin tan la thar turin kalhawmte fuihna thu a sawi a ni.
![Mizoram Public Works Department Chanchinthar PWD Mizoram recruitment](https://blogger.googleusercontent.com/img/b/R29vZ2xl/AVvXsEgOXlluQ3UdfFKfUkWB_npDEQsr63pfdyJ6UsQZmSzsDYcqZBemTtmuv0eakcbm4Kg_lB9hkjclmENIR152Agf1bEBm1xYUMteccmK7057LlvBMYZUtng1AIzw9ukLex4fwOyBrzclFdaA/s200/mizoram+public+works+department.png)
PWD hnuaiah hian kawng enkawl mek 6127 km, Lei 127 leh Building 1236 (3098 Units) a awm a. Kawng laih mek 1140 km, Lei dawh lai 9 leh In sak mek 58 a awm a ni.-DIPR
Post a Comment