Mizoramah April leh November 2017 chhungin Zunthlum 8,791 leh thisen sang 5,358 hmu
Natna inkai chhâwn theih loh lam buaipuitu, Non Communicable Desease (NCD) clinic-ah sorkar kum kal mek April-November 2017 chhung khan mi inentir 72,175 zinga 8,791 chuan zunthlum (diabetes) an nei tih hmuh chhuah a ni a, mi 5,358-in thisen sang (hypertension) an nei tih hmuh chhuah a ni bawk.
Hospital & Medical Education (HME) department hnuaia NCD clinic hrang hrangah thisen endik ṭhin a ni a; sorkar kum kal mek, 2017-18 chhunga thla riat chhung, April-November 2017 inkara zunthlum vei hmuh chhuah mi 8,791 hi inentir zawng zawng zinga (12.18%) an ni a, thisen sang nei mi 5,358 pawh inentir aṭangin 7.42% an tling.
Hetih lai hian, NCD hnuai ni lo, ICMR-INDIAB zir chianna aṭanga a lan danin, Mizorama puitling zingah, khawpuia 31.1% leh thingtlanga 23.%-in blood pressure (BP) sang an nei a; zunthlum nei pawh khawpuiah 8% leh thingtlangah 3.5% an awm.
NCD natna hrang hrang - cancer, zunthlum, BP sang, lung leh thisen zâm natna, heart attack, stroke leh khuh benvawnte chu inkaichhawn theih a ni lo. Heng natna bik buaipui tur hian NCD an awm a, Mizorama district zawng zawngah hma an la tawh a ni.
Kum 2013-14 aṭangin NCD kalpui ṭan a ni a, bul an ṭan kumah hian hma an la tam hman lo. A tirah Aizawl leh Lunglei district-ah chiah kalpui a ni a, district dang tuam zelin, tunah chuan district zawng zawng an tuam tawh a ni.
NCD state nodal officer Dr Eric Zomawia, HME-a deputy director ni bawk chuan, thisen sang leh zunthlum nei lo turin invawn uluk a ngaih thu a sawi a, "Mihring hahdamna awm zel vanga natna awm thei laka inveng turin taksa tihchêt tam a, sa thau lam leh mawm lam ei tlem a ngai tawh hle a ni," a ti.
Dr Eric Zomawia chuan, NCD hnuaiah damlo endik zat an pun zel vang te, tuna figure an tarlan chu mi pakhat vawi hnih ennawn palh a awm theih avangin a dik famkim chiah lo thei tih a sawi a; BP sang (hypertension) chu mi pangngai tan kum khatah vawi khat tal enfiahtir a ṭhat thu a sawi a ni.
BP sangin taksa pêng hrang hrang - lung (heart), thisen zám, kal (kidney), mit leh thluak a tichhe duh hle tih sawiin Dr Eric Zomawia chuan, "Stroke tam ber hi BP sang thunun loh vang a ni," a ti. BP chu 120/80 aia hniam tur leh 140/90 aia sang chu BP sang a nih thu te, a chung lam 120-140 inkar leh a hnuai lam 80-90 inkar chu BP sang hmahruai (pre-hypertension) a nih avangin mahni inenfiah fo a ngaih thu a sawi.
Dr Eric ZOmawia chuan, zunthlum veite thihna tam ber chu stroke leh heart attack a ni tih sawiin, "Kum 30 tling tawhte'n blood sugar kum tin vawi khat tal enfiah ngei ngei tur a ni," a ti.
BP sang siamtu zingah chi ei tam a tel thu sawiin, "Chi ei nasat hian BP a tisâng a, lung natna a siam a, kal thlengin a khawih thei. Puitling tan ni khatah chi gram 5 (thirfiante khat) ei a tâwk," a ti.
World Health Organisation (WHO) chhinchhiah danin, NCD natna hrang hrang vang hian kum 2015 khan khawvelah mi nuai 564 vel an thi a, India rama thihna zawng zawng zinga 60% chu NCD natna vang a ni.-Vanglaini
Post a Comment