January 27, Inrinni zan dar 7:40 vel khan Mission Vengthlang aṭanga Reiek panna kawng, Bungkawn Nursery zawn velah towing truck-in scorpio chhia a hnuh hnuaiah Lalfamkimi (37) d/o Kawlchhunga, ITI Veng chu hnukin a hnuah motor hian a kalsan a, a hnunga car kalte'n hmuin bawihsawm a ni a, mahse a lo thi fel tawh niin a bawihsawmtute chuan Vanglaini an hrilh.
Scorpio MZ01C-0125, R Lalrinmawia, Ramhlun North ta chu January 26 khan Reiek lam kal tur Tlawng leh Ailawng inkarah a chhia a, towing truck awl a awm lawk loh vangin Inrinni tlai khan hnuh a ni. Towing truck hi Lalliansanga (42) s/o Lalhmangaiha, Durtlang Melnga khalh a ni a; a bulah mipa naupang a ṭhu bawk. A motor hnuh Scorpio driver seat ah hian B Lalrinawma (21) s/o B Lalramliana a ṭhu a ni.
Zana he motor inhnuk a tawk zawnga tlan Sumo driver chuan scorpio hian mihring hnuk niin a hmu a, an mahni tawk zawnga tlan EON car chu a lo hrilh a, cara mi panga chuangte chuan motor inhnuk an hmaa tlan chu an um a, an umphak hnu chuan horn te an hmet ri vak vat a, a ding mai lo a; a hnu lawkah scorpio hnuaia a mihring hnuh a thlauh a, car aṭang chuan mi pahnih chuan motor inhnuk chu kea um a, an tiding thei ta a ni. Lalfamkimi hi a la lum na a, a marphu a awm tawh lo niin a bawihsawmtute chuan an sawi.
Aizawl police station-ah thubuai ziahluh a ni a, nimin khan Lalfamkimi kawppui (a pasal angreng) Malsawmtluanga (30) s/o Zosangliana, Bungkawn Tlangveng; towing truck neitu bakah a khaltu te; EON car a chuang mi panga, mihring hnuk nia hmutu sumo driver leh a hmeichhe phurh te hu zawhfiah atan koh an ni.-Vanglaini
Post a Comment