PMGSY HNUAIA KAWNG SIAM ENFIAH
Vawiin khan Deputy Speaker leh Bialtu MLA ni bawk Pu R. Lalrinawma chuan Zuangtui to Muthi road PMGSY (Pradhan Mantri Gram Sadak Yojana) hnuaia siam mek chu a hmuna tlawhin a enfiah a, PHED, PWD hotute leh Muthi Village Council leh NGO ten an tawiawm a ni.


Bialtu MLA Pu R. Lalrinawma chuan Muthi khua in kawng leh tui supply tha tak an neih theihnan chak taka hmalak a ni leh hmasawnna hmuh theiha a awm zel chu lawmawm a tih thu a sawi a. Khawtlang chhawr tur tho anih angin that leh that inlawma contractor leh department-te phur taka thawhpuia lo tawiawm zel turin Muthi VC leh NGO-te a chah a. Muthi khua VC leh NGO hruaitu kalkhawmte chuan thaa hnathawh tanpui an tum thu leh tha taka hna thawh anih theihnan motor tlan dan turte ruahman an tum thu an sawi bawk.

Deputy Speaker leh Bialtu MLA ni bawk Pu R. LalrinawmaPMGSY hnuaia Zuangtui to Muthi Road siam mek hi 2.260 km a thui niin side drain 1370 RM a   awm dawn a, kawng hi cheng 1,67,95,838.09 senga siam tura ruahman a ni a. Hna hi nikum November atanga thawh tan niin kumin November a zawh hman tura ruahman a ni. 

He hunah hian bialtu MLA chuan Muthi tlanga PHE Department in tuikhuah an siam chu a enfiah nghal a, he hna pawh hi zawh fel thuai an in beisei thu bialtu MLA an lo hrilh a. Pu R. Lalrinawma chuan vawiin vek hian Tuirial kawng siam that mek a hmuna tlawhin a enfiah nghal bawk a ni.-DIPR

Post a Comment

Powered by Blogger.