CHIEF MINISTER IN SOLOMONA TEMPLE A TLAWH

Nimin (14 January, 2018) chawhnu khan Chief Minister Pu Lal Thanhawla chuan Kohhran Thianghlim biakin, Solomona Temple a tlawh a; Solomona Temple Open Photo Competition lawmman a sem nghal a ni.

Solomon Temple Aizawl Mizoram:
Solomon Temple Aizawl Mizoram
Chief Minister chuan thu sawiin, Solomon-a Temple chu Aizawl khawpui tan landmark pawimawh tak a nih thu leh, chutiang bawk chuan a satu Kohhran Thianghlim member-te chu an hnathawhna hmun hrang hrangah discipline tha leh rinawmna an lantir thin nia sawi chu lawmawm a tih thu leh an entawn tlâk a tih thu a sawi a. Mizoram sawrkar in Eco-Tourism a chawisan tumna kawngah a tihlawhtlingtu pakhat chu Solomon-a Temple a nih thu a sawi a. Open Photo Competition neih chungchangah Chief Minister chuan tunlaiah chuan silai nena ramvak lova, camera nen ram an vak tawh zawk thin thu leh hetianga thlalâk intihsiakna buatsaih a ni chu lawmawm a tih thu a sawi a. Thalaite zingah silaia ramvakte hmusita, ram leh hnam hmelma an ni tih hria an tam ta hle chu lawmawm a tih thu a sawi bawk.

Solomon Temple Aizawl Mizoram
Solomon Temple Aizawl Mizoram:
Chief Minister chuan WHO Report-a a lan danin mihringte suattu tam ber chu vaihlo leh a kaihhnawih hmansual avanga thihna a nih thu leh, vaihhlo leh a kaihhnawih thil hrang hrang chu Mizo te nasa taka suattu annih thu tarlangin, kohhran tan pawh do zel hi a tih tur dik tak nia a hriat thu a sawi a. Kum kalta ah khân fur a rei avangin, Mizoram chhûnga in kalpawhna kawng a chhia in, siam tha turin Sorkarin theihtawp chhuaha hma a la mêk thu a sawi a. Chief Minister chuan "kawngte hi Sawrkar ta bik a ni lova, mipui ta a ni a, kan dim thiama kan enkawl thiam tlang a ngai hle a ni" a ti a. YMA leh Mizo mipuite nena tangkawpin ramngaw siam belh zel chu Sawrkar hmalakna kal mêk pakhat a nih thu sawiin, kalkhawmte chu hemi atan hian thawhpuiah a sawm bawk.

Solomon Temple Aizawl Mizoram:
Chief Minister tawiawmtu Pi Lal Riliani, President, Indian Society on Tobacco & Health (Mizoram Chapter) pawhin thu sawiin, zuk leh hmuam chungchanga Kohhran Thianghlimte hmalakna chu fakawm a ti a. Zuk leh hmuamin Mizo mipuite nasa taka a suatna chu a rapthlak in, "India ramah a ti nasa ber kan ni a, HIV+ve vei tamna ber kan ni bawk a, Mizoram kohhran ten tih takzeta kan vei a nasa taka hma kan lak tlan a ngai a ni,” tiin a sawi bawk. Dr. L.B. Sailo, Chairman, Executive Committee chuan lawmthu sawiin hun hi a khar a ni.
Solomon Temple Aizawl Mizoram
Solomona Temple Open Photo Competition-2018 hi category thumah then niin, participants 35 an awm a, January ni 1-12, 2018 inkarah khân inelna hi neih a ni a, a tel zawng zawngte hi pawisa fai leh certificate pek vek an ni bawk.

Kohhran Thianghlimte hian kum 2017 October atang khan Coronation Day an neih pualin Temple hi an chei tawh a, an cheina hi Dt. 15.01.2018 atang hian an khar dawn a ni.-DIPR

Post a comment

Powered by Blogger.