CHEMO-TREATMENT ROOM, CHRISTIAN HOSPITAL SERKAWN UD&PA MINISTER-IN
Vawiin khan UD&PA Minister Pu Zodintluanga chuan UD&PA Department hnuaia New Economic Development Policy (NEDP) kaltlanga sak Chemo-Treatment Room, Christian Hospital Serkawn, Lunglei chu a hawng.


Pu Zodintluanga chuan Christian Hospital Serkawn doctor leh nurse te thawhrimna leh inpekna chu fakawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. An hnathawh ropui tak avangin mi tam takin damna an chang thin a ni tiin an hahna leh an inpekna chu a thlawn lo a ni tih hre thar leh fo thin turin a chah a. Chemo-Treatment Room chu Mizoram chhim lam mipui leh thingtlang kilkhawr tak taka cheng te tan malsawmna ropui tak a ni tiin mi tam tak tan damna a thlen a beisei takzet thu a sawi bawk.

Vawiin hawnna programme Dr. B. Laldinliana, Medical Superintendent, Christian Hospital Serkawn kaihhruaiah hian Lunglei DC Pi Lalzarmawii, IAS leh sawrkar official dangte bakah BCM hotute leh docotr leh nurse thahnem tak an tel.

Dr. B. Laldinliana, Medical Superintendent, Christian Hospital Serkawn atangin report ngaihthlak a ni a. Chemo-Treatment Room-ah hian khum pathum awmin Air Conditioner, TV, Geyser leh Attached Bathroom bakah Nursing Station leh damlo awmpuitu te chawlh hahdamna a awm a. Cancer vei ten an mamawh em em hmanrua Cardiac Monitor pathum leh Syringe pump pathum dah a ni bawk. He Chemo-Treatment Room sakna atan hian UD&PA Department hnuaia New Economic Development Policy (NEDP) kaltlangin Rs. 12.30 lakhs sawrkarin a sanction a ni.

CHEMO-TREATMENT ROOM, CHRISTIAN HOSPITAL SERKAWN CHEMO-TREATMENT ROOM, CHRISTIAN HOSPITAL SERKAWN UD&PA MINISTER-IN  


Post a comment

Powered by Blogger.