KOLASIB AH DISTRICT DEVELOPMENT CO-ORDINATION & MONITORING COMMITTEE (DISHA) THUKHAWM
Vawiin khan Kolasib DC Conference Hall ah District Development Co-Ordination & Monitoring Committee (DISHA) chu Chairman Pu Ronald Sapa Tlau, MP (RS) kaihhruaina hnuaiah an thukhawm.
Chairman chuan District a Sawrkar hnathawk hrang hrangte chu Sawrkar mi rinrawl berte an nih thu sawiin Sawrkar Sum khawihtu leh enkawl tu tak tak an nih avangin rinawm taka hna an thawh a pawimawh thu a tarlang a, chu chu District leh State hmasawn ah min hruailut thei tu a ni a ti. Sawrkar hnathawkte chu khawi hmun ah pawh awm se rinawm taka mipuite tan hna thawk tur an ni a ti a mahni awmna hmun/khua a mipuite chuan kan hnathawh zar an zo tur ani a ti bawk.
Thutkhawm ah hian thutkhawm hmasa lama Department hrang hrangte ina an hnathawh thenkhat zinga bawhzui ngai te chunhchanga an hmalakna te thlirho a ni a, hemi bakah hian September- December-2017 Quarter chhunga Sawrkar Scheme hrang hranga an hmalakna te zirchian a ni.
Rural Development Department hmalakna zinga Ni Za inhlawhna (MGNREGS) hnuaiah Kolasib District huam chhungah Job Card 18190 awmin heng ho tan hian ni 50 chhung inhlawhna siamsak tawh a ni a, he Scheme hnuaiah hian hna chi hrang hrang 915 thawh mek a ni. Sawrkar Laipui ina a phut angin Aadhar leh Job Card thlunzawm hna chu 63.2% zawh tawh niin report chuan a tarlang a, PMAY hnuaiah in 209 sak mek niin IWMP project 5 a awm mek bawk a ni.
Mi harsa zawkte tana eirawngbawlna Gas a thlawna connection pekna Sawrkar Laipui Scheme Pradhan mantri Ujjwala Yojana (PMUY) hnuaiah hian Kolasib District ah Connection 106 pekchhuah tawh a nih thu Supply Office chuan an tarlang a. UD&PA Department chuan bawlhhlawh sawngbawlna tur hmun (Solid Waste management Centre) Dihmun tlanga siam mek chu peihfel a nih tep tawh thu an tarlang a, Swachh Bharat Mission (Urban) hnuaiah Kolasib District huam chhunga Census Town pali (4) zingah Kolasib, Vairengte leh Bairabi te chu ODF a puan tawh niin Kawnpui khua pawh ODF a puan thuai an beisei thu tarlan a ni bawk. PHE Department chuan Non-Lapsable Central Pool of Resources Schemes atangin Bairabi leh Bilkhawthlir Water Supply Scheme te chu thawh zawh tawh a nih thu an tarlang a, NEC Scheme hnuaia Vairengte Water Supply Scheme chu 70.81% hna thawh zawh tawh a nih thu an tarlang bawk a ni.
Chief Medical Officer hnen atanga report dawn danin Kolasib District a Sub-Centre 26 te chuan Health Worker an nei vek a, Damdawi ina nau piang/nei (institutional Delivery) chu za ah 98.23% niin kum tlinglo nausen thi (infant Death) chu 20.3% a ni a, Malaria vanga mi thi an awmlo a ni. Hemi hun chhunga thisen endik mi 1170 atanga mi 55 (4.7%) chu HIV Positive an ni tih hmuchhuah a ni a, Nu nau pai/ Raipuar mi 458 thisen endik atangin HIV Positive an awmlo thung a, Medical Staff chuan Kolasib District chu HIV/AIDS hluarna District a nih na chhan bulpui ber chu Damdawi inchiu na hriau (Syringe) in hmantawm vang a nih thu tarlangin, Mipat hmeichhiatna pawh a chhan lian tak a nih thu a sawi a hemi avang hian lo theihloh in Pawhfan hmang uar tura inzirtirna (Condom Promotion) chu an kalpui nasat thu a tarlang bawk a ni.
Thutkhawm ah hian Sawrkar Department hrang hrang hotute leh tlawmngai pawl atangin Sub-Hqrs YMA leh MHIP aiawh leh Thingthelh VCP te an tel a ni.-DIPR
Post a Comment