MYC KALTLANGIN JET AIRWAYS CABIN CREW LAK A NI LEH DAWN TA

JET AIRWAYS CABIN CREW LAK A NI LEH DAWN

“Mizoram Youth Commission-in Language and Aviation Training kan buatsaih tur hi a ṭha thei ang bera kalpui kan tum avangin Mizoram ṭhalaiten seat pawh rawn inchuh hial tlak turah kan ngai a ni.”

- Joseph Lalhimpuia, Chairman, Mizoram Youth Commission

Mizoram Youth Commission (MYC) leh Jet Airways te'n thawh hona an lo neih tawh ṭhin angin March 27, 2018 hian Aizâwlah Jet Airways-a thawk tûr Cabin Crew lâk a ni leh dâwn ta a; hemi atâna Mizoram ṭhalaite lo buatsaih lâwkna (Grooming/Pre-Recruitment Training) Language and Aviation Training chu Mizoram Youth Commission chuan anmahni Office-a an Training Hall-ah ni 26.2.2018 aṭanga 26.3.2018 thleng, thla khat chhung awh an buatsaih leh dâwn tih Pu Joseph Lalhimpuia, Chairman, Mizoram Youth Commission chuan a sawi.

MYC Chairman Pu Mahima chuan, “Cabin Crew lakna tura Mizoram Youth Commission-in training kan buatsaih turah hian Training Hall Seat capacity kan neih zat mi 150 kan la ang a, duhsak zawngte la loin, ‘First come, first serve,’ hmangin enrolment kan ti dawn a; Mizoram ṭhalaiten Spoken and Aviation Training kan buatsaih tur hi a ṭha thei ang bera kalpui kan tum avangin Mizoram ṭhalaiten seat pawh rawn inchuh hial tlak turah kan ngai a, mi thiam tak tak (Trainer/Expert)-in an lo enkawl dawn a ni,” a ti a ni.

Mizoram Youth Commission hian hun eng emaw ti aṭang khan Jet Airways leh Spicejet nen thawk hoin Mizoram ṭhalaite tan Cabin Crew leh Ground Staff lakna an lo nei tawh ṭhin a; hetiang atana Mizoram Youth Commission-in a lo buaipuiho, an hnen aṭanga Mizo ṭhalai an lak tawh zat pawh kum 2014 - 2017 chhung khan Cabin Crew mi 30 leh Ground Staff mi 4 - an vain mi 34 an ni tawh a ni.

Jet Airways-a thawk tûr Cabin Crew lâkna tura MYC Spoken and Aviation Training duh tana Eligibility Criteria leh hriat tur pawimawh ṭhenkhat chu hengte hi a ni :-

1. Age : Kum 18-27 inkâr.


2. Height : Mipa 5'7" leh hmeichhia 5'2" aia hniam an ni tûr a ni lo.

3. Weight :  Mahni san zawng nena mil tawk

4. Physical features, etc. : Pian ṭha, hmêl hmuh nuam, hmai bawl lo leh mâm ṭha, hmaia arngêng hnuhmâ leh ser awm lo, tattoo nei lo, mit ṭha pângngai, mi biangbiak leh mi chhâwn thiam tak.

5. Educational qualification : HSSLC leh a chung lam pass (Kum 2018-a HSSLC exam tûr/result nghâk tân dîl theih a ni bawk)

6. Marital Status : Nupui/pasal la nei lo.

7. Nationality : Indian

8. Passport size thlalâk : 2 copies.

9. MYC-a Training fee : Free


10. Registration dîlnaa document thil tel ngaite : MYC Office, AIS Transit Accommodation Building (2nd & 3rd Floor), New Secretariat Complex, Near MPSC Building, Aizawl-ah dilna form siam sa dah khatin theh luha registration/admission tih nghâl theih a ni ang a; Class X leh Class XII Certificate xerox copy attest sa leh Passport size thlalâk copy 2theh luh tel tûr a ni.

11. Registration tih theih hun chhung : Ni 21-24 February, 2018

Mizoram Youth Commission Chairman Pu Joseph Lalhimpuia chuan Mizorama District khawpui tinah Youth Summit huaihawt tur leh Aizawl leh Lunglei khawpuiah IIT-JEE/NEET Coaching Class (Crash Course) buatsaih tura chak taka hma an lak mek thu a sawi bawk a; chubakah, University Grants Commission (UGG) pawmpui University atanga pass chhuak Gold Medalist-te chu lawmpuina leh chawimawina pawisa fai pek an nih tur thu a sawi nghe nghe bawk.

Source: DIPR Mizoram

Post a Comment

Powered by Blogger.