political talks hpcd mizoram sawrkarMizoram sorkar leh HPC (D) aiawhte political level-a an inbiak thawh khatna a sorkar palaite ho turin Political Adviser to Chief Minister Pu Lalrinmawia Ralte, MLA chu rawt a ni.



Home department atanga thudawn danin March thla bula Aizawla Mizoram sorkar leh HPC (D) aiawhte inbiakna tur hi political level-a inbiakna bul tanna tur a ni dawn a, hetah hian sorkar aiawhte ho turin Minister hlui Pu Lalrinmawia Ralte chu rawt a ni a. A hnu lama sorkar palai hotu tur hi chu la ngaihtuah chawp leh tur ni a thudawn a ni. Home Minister Pu R. Lalzirliana chuan inbiakna neih hun tur hi March ni nga tinzawn a nih thu a sawi a. Boruak \ha tak hnuaia inremna neih ngei tuma inbiakna hi kalpui a nih an beisei thu Home department hotute chuan an sawi.

HPC (D) hruaitute chuan sorkar hun ruat hi official tak chuan an la dawng lo niin an sawi a. An pawl palai hruaitu tur an la ruat fel lova, a hma lama palai hruaitu an pawl working president Pu Lalthalien Hmar chuan a rawn ho leh lo a nih pawhin inbiakna kawnga an pawl thupuangtu a ni zui ang.

Home Minister chuan nikum lamah khan HPC (D) nena political level-a inbiakna hi Krismas hma ngei a neih tum a nih thu a sawi na in sorkar lamah chinfel ngai a tam nia hriat a ni a. Kum 2016 August ni sawm leh nikum September ni 22 inkara official level-a inbiakna rah chhuah Sinlung Hills Development Council hnena thuneihna sang zawk pek leh a ruangam siamthat rawtna, a hming pawh Sinlung Hills Council tia vuah tura rawtna awm chungchangte zir chiang turin Chief Minister Pu Lal Thanhawla chuan rorellai MLA pathum awmna Committee a din a, hei hian duh angin thil a kal chak pui theih loh phah ta nia thudawn a ni.

Home department atanga thudawn danin inremna thuthlung tur hi duan fel thawkhat a ni a, Sinlung Hills Council chungchanga Assembly dan siam tura chhawp chhuah hi Assembly a pharh a nih hma pawhin a remchan chuan inremna thuthlung hi lo ziah theih a ni. Pu H. Zosangbera kaihhruai HPC (D) te hian India Constitution Schedule parukna hnuaia Autonomous District Council hrang an ngiat thin chu sirtluk an remti ta nia sawi a ni a, hemi avang hian inbiakna hi neih a ni ta a ni. - AIR Aizawl

Post a comment

Powered by Blogger.