"Porn" tih hi India ram internet-a thumal zawn nasat berte zinga mi a ni mek a, khawvela porn site tlawh nasa ber ber ram thlan chhuahte zingah pathumna dinhmun kan luah mek bawk. Mizoramah pawh hian a hmei a pain, social media-a kan thu post leh comment-ah heti lama kan rilru sukthlek zau sawtzia a chiang tulh tulh a; a ruh baka a thling nen lam langa hriat leh hmuh zung zung theihna khawvela kan chen mek lai hian a ţul ber em tih ka ngaihtuah hnuah, sumkar lutuk awm loin porn khawvel fenhnuai i'n hlim phuk te'ng.
US state pakhat Nevada-a Las Vegas khawpui daifema awm San Fernando valley, Pornoland an tih bawk khu khawvela puitling film siamna hmun lian leh hriathlawh ber pawl a ni a. Khu hmun aţang khuan company hrang hrang Vivid, Evil Angel, Gonzo etc. te chuan internet-a porn film kan hmuh tam tak hi siam chhuakin, kum khat chhungin a changtu mi sangkhat telte chuan film 5000 vel an tichhuak ziaha ngaih a ni. Khu hmuna awm heti lama inhmang mekte khu sex hmang tawn lo an awm mang tawh lo a, khu valley-ah khuan kumtin mipa chi gallon 70 vel a luang ral ţhina ngaih a ni.
A rama zawngin USA khu khawvela porn kaihhnawih DVD leh web material-a thawhhlawk ber an ni hrim hrim mai a, minute 39 vel dan zela porn film pakhat siam chhuak ang niin an dawtah Germany a awm ve bawk. Feh kal pah pawha kan hmeh chhuah zung zung theih tak porn site-te hi second-tin hian mi maktaduai 30 velin an tlawh reng a, khawvel pumah tleirawl (teens) lam site zawn nasat ber a ni nghe nghe.
Canada khawpui pakhat Montreal-a kum 1982-a piang Lara Roxx-i hi fanu mal niin chhungkaw vantlang (middle class) an tih angah hian a lo seilian a. Hmeichhe naupang dangte ang bawka hlim thei leh ngainatawm tak ni mahse nikhua a hriat tak tak hnua an chhungkaw boruak ţha nei khat lutuk, a nu leh pa inngeih lo leh ţawngkam chhe tak taka inhau fo maite chuan a nun chu a tihreawmin a hringtu nu leh pa mah ni se a ngaina ta lo tial tial a. Tleirawl a lo nih chuan sap ram kalphung, mahnia inchawm ngei duhna a nei lian ta sauh sauh a; kum 21 mi chauh a nih (2004) chuan US lamah a tla thla ve ta rawih a ni (haw lehna ticket man a neih lohte, sawi tur a tam).
Danin a phalna ram a nih miau avangin online porn agent te'n thiam taka an thlem luh nula/tleirawl dangte ang bawkin Lara-i chuan director-te thu an awih dana zira porn film chan a hlawkziate, scene khata dollar 800-4000 (hmeichhia ve ve, mipa leh hmeichhia, a bak chu zep mai ang!) hlawh mai theih a nih dante a hriat chian lehzual hnu chuan kum rei lote sum tuak nana hman a, chhuahsan leh mai rilrukin porn khawvel chu a luhchilh ve ta a ni.
Porn changtute hi an thawhna company-te'n an phut angin ni 30 dan zelah thisen test tura tih an ni a (company ţhenkhatah chuan ni 25 etc), a huhoa shoot a tam thla phei chuan an testing laboratory neihchhunte chu an lun hle ţhin. An laboratory chhuanvawrte lah chu rin ang he huin a lo chuti lua lo khawp a, helai hmuna an rinrawl ber pawh hi porn star retire tawh Sharon Mitchell-ihoa din niin (Adult Industry Medical Health Care Foundation) clinic pangngai ve mai a ni a, HIV bakah STD dang Chlamydia, Gonorrhea leh Syphilis-te an test-sak ţhin.
Lara-i pawh chu a scene chan hmasak ber aţanga thla khat a liam awrh tihah Brazil lam mi negro tlangval lian ţha tak mai (a lian khawp mai!) Darren James-a nena chang dun tura tih a nih angin a chang ve leh ta a. Hemi ţuma an chan hi a hnu interview-a a sawi leh danah chuan mipat hmeichhiatna hman dan pangngai baka uchuak tak "hardcore" niin Director-ten ti tura an hrilh pawh chuan a huphurh hle a, "Ka thin hi a phu dup dup ringawt mai a ni." a ti hial a ni.
A chanpui tur Negro tlangval Darren James-a chu Brazil-ah, porn film dang changa a thangbo hnua lo let hlimhlawt a ni nain tluang takin an zo ta tho a, Darren-a hian an chan dun hma hian HIV test nei nghe nghein engmah erawh hmuh a ni lo. Chumi hnu ni rei lo teah chuan Lara-i in-test hun chu a rawn her chhuak zui a, test result a han hriat chuan a lo positive reng ta mai a; "Ţap chungin ka awm leh bang ka chum a, a sawt si lo. Hremhmun a ni e." tiin nun hlutna hre lo leh, "HIV AIDS avang khera thih ai chuan" tiin intihhlum a tum zui a. A eng zawnga thil thlir thiam mi, ama sawi dan takin, "Zing ni chhuak leh sava hram rite'n" chona thar a pek theih nula chu ni lo se khawvelah hian a awm ve tawh lo ang.
Ngaihngam taka a khawsakpui Darren James-a chuan an chan dun hmaa a thang bo zawk lai khan Brazilian actress Bianca Biaggi-i chu Rio de Janeiro-ah porn film hleihluak tak dang "Split That Booty" a lo va chanpui a. A lo let leh chuan thisen test nghal mahse HIV hrik hi an kai aţanga ni 10 hnuah emaw lo chuan khawlin a hmu thei lo a ni awm e; fihlima inngai tawnin hmangaihna tel lo hmeichhiat mipatna chu uar takin an chen dun a ni.
Tichuan, kum 2000 hnua a vawi khatna atan mi pakhat HIV infection thu thang vel chuan porn industry chu a han tiralkhel ta tak tak mai a, film lama a sexy leh uchuak theihtawpa che ţhin rualho mangang chuan AIM clinic te tak te chu thinphu dup dupin an pan ta hlawk hlawk hlawm a. An chanpui hnuhnung berte chin hriat tumin an in-phone kual re ru a; tituai nalh, hnute leh mawng len tih lamin eng lukhawng mah a nei tawh lo. Sawrkar beng a thleng zui a, saruaka awm nuam ti em em ţhinte chuan an ngainat vang ni hauh loin coat leh necktie suihho an hmachhawn ta sek mai a ni. Porn industry-te pawh chu thla khat chhung khar vek tura (a tir thuchhuakah thla ruk) tih niin an chawl ta ţhuap a, April thla a nih meuh chuan Darren James-a'n a lo va chanpui dang pahnih Jessica Dee leh Miss Arroyo-ite pawh chu an positive thu hriat a ni ve leh ta a ni.
James-a pawh chuan HIV hrik a pai tih a inhriat ruala a nu leh pa'n porn industry-a a thawh thu an hre chhuak nen, a rilru hah lutuk chuan intihhlumte a tum zui ve ta bawk a. Ani hi kum 2004 chho kha a vanglai tak niin film chang tura foreign rama a kal nasat bakah kar khata ni 6 ngawt mai film chan changte neiin ni khata scene hnih/thum shoot an neih ţhin thute pawh a sawi. Nimahsela, "Superman, hneh theih loh emaw ka inti ţhin" inti khawpa taksa chak leh fit ţha ţhin chuan tunah hian viral infection zual zel avangin nunkhaw hreawm tak a hmang mek a; a positive thu phone-a an hrilh hmasak ber ţum phei chuan, "Dula theihtawpa min hnek ang mai hi a ni a, ka khawvel hi a tawp vek a ni." a ti.
A positive thu a tlangthan tak bawk si avanga rilru hah lutuk chuan Tijuana (Mexico) lama tlan bo tumin bus ticket a la nghal a. A va thlen chuan vawi eng emaw zah intihhlum tuma a beih hnuah ni khat a han harhchhuak chu San Diego hospital-ah a lo mu reng tawh mai a. Damdawi ţha nena thla eng emaw zat enkawl a nih hnuah rilru pangngai pu leh theiin dam zui chakna a nei leh ta chauh a ni.
James Darren-a pawh hi Lara-i ang thoa he valley-ah hian hna ţha zawk zawnga lut a ni a, hun rei tak chu then kualin a ţhianpa garage-ahte a riak nawk nawk ţhin. Khawsak a hautaka sum mamawhna a san em avang leh chutihlai chu actor mihang an zawn mek lai a lo ni nen porn khawvel chu a luhchilh ve ta a ni. Helama vun ngo tawh phawt chu tia khabe zawl durha kan lo thlir tam takte hi anni ang bawka nunkawng bumboh hi an ni nawk mai.
Chutia rilru pangngai pua a awm chhoh leh theih hnu hian a nun chu nasa takin a inthlak danglam ta a, midang ţanpuina leh a bikin porn fak lo chunga condom hmang tura rawtna pawh vawi tam tak a siam tawh a, "I him emaw i inti a, i him si lo. Scene karlaka chawlh lailawk chhung chauh pawhin eng thil pawh a thleng thei. In mangchhia, a tak chang tura inhlauh em em kha kei chuan nitin ka nunpui mek a ni." a ti.
Lara Roxx-i pawh hi hmeichhe paukhauh tak niin tleirawl nun bawraw tak takte bulah a hun tam zawk a hmang chho mek a, a chanchin lungchhiatthlak tak hi Canadian documentary film pakhat "Inside Lara Roxx" tia siam niin mite'n an hlut hle a ni.
Lemchan a nih anga chan chawp, nunphung pangngaia tih ve rem lo thil hleihluak leh uchuak tak pornography hian mi tam tak nun a tichhe mek zel a. Sapho society-a chhungkua leh nupa inkar a tihchhiat nasat tawh bakah (statistics tam tak hmuh tur a awm) keini Mizo ţhalaite pawh min ei chhe mek a nih hi.
Chanchin rapthlak tak tak dang sawi tur tam tak awm karah porn khawvela mi hlawhtling ber pahnih, Queen of Porn an tih mai Jenna Jameson-i, a vanglaia zan khata dollar 2000 chuang hlawh thei, damdawi hman sual leh nun pawlawh lutuk avanga a hmangaih em em a fa phirte ngei pawh hmu tura dollar 500 chawi ngai ziah tawh chanchin leh hmeichhe sang eng emaw zah mutpuitu, King of Porn an tih mai Ron Jeremy-a, a lung an zai dawn ţuma a thih hlau mangangin porn star-te nun dik kawhhmuh tura din X3 Church pastor Craig-a ţawngţaipui tura a ngen dan aţangte chauh pawh khan zir tur kan ngah hle awm e.

Post a comment

Powered by Blogger.