Zofa Global Network (ZGN) 1st. Zofa Global Convention 2018

"Hnam changkang apiangin hnam pawimawhna an hre thin" - HM Zira

1st. Zofa Global Convention 2018Zofa Global Network (ZGN) chuan, nimin khan Aizawla Chanmari YMA Hall-ah 1st. Zofa Global Convention an buatsaih a; khuallian, Home minister R Lalzirliana chuan, hnam changkang apiangin hnam pawimawhna an hriat chian thu a sawi.

R Lazirliana chuan, hnam ropui leh changkang apiangin hnama chian pawimawhna an hre chhuak thar zel a, an chawr chhuahna hnam nun theihnghilh lo turin sum leh tha pawh an sêng hreh ngai lo tih sawiin, "Kan awmna tlang hrang hrang aṭang hian thinlung hmun khat kan put theih nan ṭan i la zel ang u," a ti.

Mizote chu hmun hrang hrangah an cheng a, ṭawngte pawh an inhre tawn lutuk tawh lo nia sawiin Minister chuan,  "Unau ni chungin ramri leh khawsak kawng inan loh vangin kan inkungkaihna leh inlaichinna pawh a dal tial tial a ni," a ti a; ṭhangtharte'n unau nihna pawh an man thiam lo zel ang tih a hlauhawm thu a sawi.

R Lalzirliana chuan, Zo hnam chi hrang hrangte'n unau an nihna an theihnghilh loh a pawimawh thu sawiin, "Zo fate hi ram inrelbawlna avangin India, Bangladesh leh Myanmar-ahte ṭhen darhin kan awm a, India ram chhungah pawh state hrang hrangah kan awm darh a, ṭhen darha kan awm avang hian zawi zawiin kan rilru pawh a hrang tial tial niin a lang," a ti.

ZGN chairman Sangzela Tlau pawhin thu sawiin, "Zo fate unau kan nihna sawh nghet tur leh nasa zawka inpumkhat turin ṭan kan la zel dawn a ni," a ti a; theih ang tawka in­unauna ṭha neih tum turin kalkhawmte a fuih.

Inkhawmah hian Central YMA, MSU, MZP leh ZoRO hnenah Zo fate inpumkhatna atana an hnathawh ṭhat vangin chawimawina thuchei hlan a ni.

ZGN hi July 2, 2013-ah din niin, an thupui chu ‘Unau kan ni’ tih a ni a; an tum ber chu khawvel hmun hrang hranga awm Mizote nasa lehzuala insuihkhawm leh inṭanpuia inngaihsak tawn a ni.-Vanglaini

Post a Comment

0 Comments