mizoram assam ramri buaina mzp chawlbuk sakVawiin ni 9.3.2018 (Zirtawpni) Mizo Hnam Run chhung inkhawmah MNF Sr Vice President, Home Minister hlui Pu Tawnluia chuan thusawiin, " Mi zawng zawng mit Bairabi-ah a fu ṭhup mai tih kan hria a, Assam sorkar aṭanga Police leh Officer-ten kan ṭhalai rual ralthuam nena vauin tiang hmangin an sawisa hrep a, Mizoram sorkarin a ngaihsak duh hauh lo. Keini hi kan ngawi mai mai dawn lo. Kan hotute leh ṭhalai rualten engkim an thlithlai reng a, an vila an awm ve reng a ni. 

Vawiina 'Mizo Hnam hnatlang' koha tel tur pawhin MNF hruaitu tam tham tak, Pu K.Sangṭhuama MLA telin an thawk thla a ni. Hetianga Assam Police leh Officer-ten kan ṭhalaite chunga nasa taka kut an thlak chung pawha sorkar hotute ngawireng kan nei hi demawm kan ti a, mipui pawhin an dem a ni.Kan hunlaia IR Bn. li(4) lai kan lakte pawh kha hetianga ramri buai atana kan lo buatsaihte an ni," a ti.

Pu Tawnluia chuan MNF-in Mizorama Kristianna humhalh tlat a tum tur thusawiin, "Tunlai hian kan ram chhungah leh India ram chhungah Kristianna nekchepa awm anga thu vawrhdarh an awm nia hriat a ni a. India sorkar nen inremnaa kan lo ziahfel tawh ang leh India danpui Article 371(G)-a lo ziah tawhte behchhanin kan Kristianna min tihchhiat tum an awm a nih chuan MNF chuan a tawp thleng kan do dawn a ni. Kristianna humhalh hi MNF Party thiltumah pawh a tel a ni. Kristianna dodaltu an awm a nih pawhin sorkar ang pawhin, politics ang pawhin a tawp thlenga do hi kan tih tur a ni. Mite kan va tibuai ang tihna ni lovin, hetiang thu vawrhdarh hi lo awm pawh ni se kan nghing tur a ni lo," a ti.

mizoram assam ramri buaina mzp chawlbuk sakA sawi zelnaah Pu Tawnluia chuan, "MNF chuan mipui sorkar kan din dawn a, mipui sorkar kan din chuan mi zawng zawng huap a nih dawn avangin Huapzo sorkar kan din dawn tihna a ni. Hlemhletna awm lo (Corruption Free) sorkar a ni dawn a, a chhan chu engkim langtlang vek a nih dawn avangin Langtlang sorkar kan din dawn a ni. Engtinnge langtlang a nih theih ang kan tih chuan kalphung thar hmangin sorkarna a kal tawh dawn a, mipuiten thuneihna tam zawk an neih theihna turin Thuneihna semzai (Decentralisation of Power) a ni dawn a ni. Mipui sorkar, Huapzo sorkar, hlemhletna awm lo langtlang sorkar kan siam dawn a, Pathian ṭih chungin 'Pathian leh kan ram tan' kan kal dawn a ni," a ti bawk.

Mizo Hnam Run chhung inkhawm hi Pu Liansuama Adviser (Ex Minister)-in a kaihruai a ni.

(LALTHANZUALA HNAMTE)
Secretary
Media & Publicity Dept
Mizo National Front
Memo No.MNF/Media/2018/01/188
Dt.09.03.2018.

Post a Comment

Powered by Blogger.