Mizote kût pui ber, Chapchar Kût chu nimin khan Lammualah hlim taka hman a ni a, Mizoram pawn hmun hrang hrang aṭangin kut chhim tur hian Zohnahthlakte an lo kal a, Kut Pa chu Art & Culture minister R Romawia a ni. Kumin Chapchar Kut thupui chu 'Sem sem dam dam, ei bil thi thi' tih a ni a, vawiinah chhunzawm a ni ang.
R Romawia chuan hnam zia leh hnam nunphungte chu mihringte siam chawp ni loin Pathian min pek a nih thu sawiin, "Min petu ti beidawng loa, chhawm nun zel hi kan mawhphurna a ni. Pi leh pute nun dan kan Kristianna nena izawm tlatte hi kan chhawm nun zel chuan kan hnam a boral ngai lo ang. Mi hnam tihdan kan entawn tlat erawh chuan kan hnam hi a ral vek ang," a ti a, Mizo hnam nunphung chhawm nung tlat turin Mizo mipuite a sawm.
Kut Pa chuan kan pi leh pute hunlai chu a neite'n an neih ang ang an pumbilh ngai loh thu sawiin, "A neih ang apiang sem zeltu chuan sem zel tur a nei ṭhin. Mahni puala ei bil chu nun tawina a nih piah lamah nun khawharna a ni," a ti.
Thusawitu dang Central YMA general secretary Lalhmachhuana chuan Chapchar Kut chu lungngaihna ata hlimna, rilṭamna ata puarna leh manganna ata lawmna ni atan hman ṭhin a nih thu sawiin. "Sem sem dam dam, ei bil thi thi tiin mahni neih ang ang midang tan an hlan ṭhin," a ti.
Lalhmachhuana chuan Mizote chu mahni thil tih ṭhat mahnia inpuang chhuak hnam kan ni lo tih sawiin, "Hei hi kan chhawm nun reng a pawimawh. Kan thil tih ṭhatte hi midangte puan chhuah atan dan tur a ni. Chapchar Kut hian Mizo nunze mawi tlawmngaihna rawn her chhuahpui leh mawlh teh se," a ti.
Chapchar Kutah hian Kut Thlengtu chu Art & Culture director R Hmingthanzuala a ni a, Myanmar, Bangladesh, Meghalaya, Tripura, Assam leh Manipur aṭanga Zohnahthlak lokalte pawhin thu an sawi a ni.
Lammuala Chapchar Kût hmannaah hian Mizo nun zia chi hrang hrangte tarlan a ni a, zaithiamte an zai bakah, hnam lâm hrang hrang entir a ni.
Lammuala hun hman a nih bakah Chapchar Kut pual hian Assembly Annexe-ah flower exhibition, Vanapa Hall-ah photo & painting exhibition leh Lammualah handicraft/handloom & food exhibition buatsaih a ni.
Chapchar Kut hi vawiinah Lammualah hman chhunzawm a ni dawn a, Mizoram hmun hrang hrangah pawh hman a ni ang.
Lammualah hian ruahmanna hmasaah chuan Kut Pa atan Myanmar-a Chin State Hakka chief minister U Salai Lianluai leh Kut Thlengtu atan chief minister Lal Thanhawla ruat a ni a; mahse rokhawlhna avanga an hman loh avangin Kut Pa Home minister R Lalzirliana leh Kut Thlengtu Tourism minister John Rotluangliana a ni ang. -Vanglaini
Post a Comment