"Nghah Loh Dâwr aia thil mak ka hria."
tualpui haw runpui
By ~ T.C.Lalremsiama

Ka pian leh mûrna Tualpui khua ('Tual' hi 'lian tual tual' tiha 'tual' lam rîk anga lam tûr) chuan ni 27-28 March, 2018-ah HÂW RÛNPUI an buatsaih a, ka nupui leh ka fapa panga zînga a upa pathum hruaiin kan kal ve a; kan fapa naupang ber leh a dawttu erawh chu an zirna nêna inkaihhnawih, loh theih loh thil avângin kan hruai ve thei lo a, kan kim lo chu a pawi ka ti hle.



Kan khaw Hâw Rûnpui hi Tualpui khua bialtu MLA Pu TT. Zothansânga chuan ni 27.3.2018-ah hun min hmanpui a; kan khawchhuakho zînga Mizo mipui hriat hlawh Pu Lalduhoma, President, ZNP te, Mizoram Synod Ex-Moderator Rev. H.Lalrinmawia S/o Upa Chalkhûma (L) fapa H.Lalnunsiama (Sûntêa) leh MAL Book of the Year Novel ngaihnawm tak 'Hmangaihzuali' leh 'Anita' ziaktu Pu C.Laizâwna te pawh an hâw tel ve bawk.


Kawng hrang hranga mi hming ṭha leh hlawhtlinga kan ngaih eng emaw zât chawimawina kan neihte zîngah kan fa hming koh chu sports lamah India aiawha International Karate Championship-ah Gold Medal 2 a lâk avângin leh India aiawha World Karate Championship leh Asia Championship a khelh avângin chawimawi tel a ni ve a; Tualpui Welfare, Aizâwl chuan thu chei mawi tak an hlân a, kan lâwm hle. Tualpui Welfare, Aizâwl aiawha thu sawi tûrin hruaituten min tih avângin ṭhalaite mamawh leh hriat tûr ni-a ka ngaih, Political Education, Social Media & Digital World, Education & Career, Entrepreneurship leh Global Village chungchâng minute 20 chhûngin ka sawi hawng zuai zuai ve hlawm a, a chhawr ṭangkai duh leh mi pângngai tân chuan kawng inkawh hmuhna a nih tho ka ring!

Kan khua Tualpui hi kum 33 zet ka hmuh tawh loh hnu, July 2017 thla laihâwl khân Aizâwl aṭangin ka han kal zuai a; tûnah nupui fanauten min hmuhpuina hun remchâng a nih avângin leh hâw ve ngei ṭha ka tih avângin ka hâw ve leh ta a ni. Kum 2017 leh tûna kan khua Tualpui ka hâw boruaka ka thil hmuh leh hriat tlêm tê hetiang hian ka'n târ lang zui teh ang :-

1. Huho tlâwmngaihna te, publicise ang chî tlâwmngaih te hi a awm ve ngei em tih ka hre chiah lo nâin, ka hriat chian chu, Zonun mawi leh hlu, mi dang hriattîr kher loh chi Mizo tlâwmngaihna kha mi nâwlpui mi mal nunah mit loin a la nung reng.

2. Tûnah in 140 zet khua a ni ve a, sawrkâr phalna emaw, sawrkâr phal loh emaw pawha zu zuar tu mah an awm lo a, zu ngawl vei an awm ve lo bawk.

3. Kâwi kâwm thin ang maia inlungrual, khawtlângin ṭûl leh pawipang a neih rêng rêng chu Kohhran leh Political Party hrannain a daidan ve loha thu khat vuaa awm mai ṭhîn an ni.

tualpui haw runpui4. Tualpui khuaah chuan mikhual rûkrûk chîng zin an awm a nih loh chuan engmah thil bo a awm ngai lo a, rûk awlsam chi electronic thil leh mobile phone charge lai lên/feh chhuahsan mai mai te a awm bâkah, sum hmun/bathlârah gas bûr an riah mai mai ṭhîn a; Champhai khua, Tualpui H/S-a Zirtîrtu hna thawk hnênah kan û pakhat a thleng a, kawngka kalh lova an lêng chu kan û chuan mak a ti deuh a, "Enga ti nge kawngkâ i kalh loh?" a ti a. Zirtîrtu chuan, "Tualpui khuaah kawngkâ kalh a ngai ve hlei nêm, mikhual rûkrûk chîng an lo zin a nih loh chuan thil a bo ve ngai lo a, kawngkâ do emaw, hawlhkalh mai emaw hi a tâwk alâwm," tiin a chhâng. Hei hi a ni, NGHAH LOH DÂWR AI MAHA THIL MAK KA TIH CHU NI!


5. Tualpui khua hi an fai êm êm a, khawi khua aṭang pawha Tualpuia zin ni ila, bawlhhlawh paihna ngeiah lo chuan inah leh khawlai khawi hmunah mai pawh bawlhhlawh bâwm ni loa bawlhhlawh paih zeuh a zahthlâk hle.

6. Tualpuiah i zin ve duh a nih pawhin i duhna hmun apiangah i thleng thei ang. Hmânlai aṭang rêngin tu mahin mikhual an hnar ngai lo a, an tlin tâwk leh phâk tâwkin tute pawhin mikhual an lo dawngsawng vek zêl a; Pathian thuin a sawi ang takin mikhual chungah ṭhat an chhuah ṭhîn a ni.

"Tualpui khua chu khawiah nge?" tia i rilrûah zawhna a awm a nih chuan, "Khawi khaw kawng mah a ni ve lo a, khaw nuam tak, 'Mârema Mi Hnuaihnung' te khua a ni," tiin i inchhâng nghâl dâwn nia!

-Ngaihlungdum Institute®

Post a comment

Powered by Blogger.