Vawiin chawhma khan Government Higher Secondary School, Lungleiah District Bawrhsap Pi Lalzarmawii, IAS chuan Mizoram Youth Commission (MYC) buatsaih zirlaite tana Medical College entrance tura inpuahchahna class Online Coaching Class for NEET a hawng.
Hawnna programme Prof J. Zorema, Principal Government J Buana College kaihhruaiah hian Pi Lalzarmawii chuan thu sawiin Online Coaching Class hawn ani chu Mizoram chhimlam mipuite, a bik takin thalaite tan malsawmna ropui tak a ni tiin he Centre din tura thahnemngai taka hma la tu MYC Chairman Pu Joseph Lalhimpuia chungah lawmthu a sawi a. India rama coaching class tha berte zing ami ALS hnuaiah Mizo thalaiten an zir ve thei tur chu hmasawnna rahbi pawimawh tak a ni tiin zirlaite chu taima tak leh tum tak takna rilru nen inpuahchah turin a fuih a ni.
He hunah hian Pu Lalsawmzuala, Under Secretary, MYC in Technical Report a pe a. He Coaching Centre hi Very-small-aperture terminal (VSAT) Satellite hmangin Alternative Learning Systems (ALS) Delhi Online class neih thin a ni ang. Vawiin March 28, 2018 atang hian thla khat awh tur Online Crash Course for NEET chu neih tan nghal a ni ang. June thla atangin kum hnih chhung awh tur IIT-JEE leh NEET Coaching Class tan a ni dawn bawk. Class hi Government Higher Secondary School Chanmari Lunglei-ah neih thin a ni ang. Admission la duh tan Labour, Employment & Skill Development Office, Bazar Veng Lunglei-ah (7641026891) leh Coaching Centre GHSS ah Pu Chawngchhuana Chawngthu zawhfiah theih a ni.-DIPR
Post a Comment