Mizo National Women Front (MNWF) chuan March 29, Ningani chhun khan Mizo Hnam Runah Mizo hmeichhia, ram tana pên chhuak thi tawhte leh la dam, Aizawla awmte chawimawina inkhawm an buatsaih a; mi 94 hnenah chawimawina hlan. MNF president Zoramthanga'n thu sawiin, "Theihtawpa ram leh hnam tana nunna thàpa inpekna kha mi dangte sak ve theih loh hla mawi a ni," a ti.
Inkhawm hi MNWF president K Lalrengpuii'n a kaihruai a; Zoramthanga chuan, "Ram leh hnam tana thawk chhuak tawh zawng zawngte inpekna kha a ropui a, Pathian leh mipui zarah kan sorkar ang a, hei aia ropui zawkin chawimawina kan la pe ang che u," a ti a; India ram leh khawvel hmun dangah ngaih pawimawh a nih ve ṭhin chhan chu, chief minister hlui a nih vang ni loin, ram leh hnam tana a lo pen chhuah tawhna vang a nih thu a sawi.
Theihtawpa ram leh hnam tana nunna thâpa pên chhuah chu mi dangte sak ve theih loh hla mawi a ni tih sawiin Zoramthanga chuan, "A rei tulh tulh ang a, a hlu tual tual ang. Mi dangte sak ve theih loh hla mawi kan neih ang hi mi tam takin neih ve an châk em em a ni," a ti.-Vanglaini
Post a Comment