MIZORAM-ASSAM RAMRI ZOPHAI ENFIAH DAWN - TIMES OF MIZORAM

Breaking

Home Top Ad

Post Top Ad

MIZORAM-ASSAM RAMRI ZOPHAI ENFIAH DAWN

MIZORAM-ASSAM RAMRI ZOPHAI ENFIAH DAWNNimin khan Ministry of Home Affairs (MHA) kaihhruaina hnuaiah Mizoram leh Assam chief secretary-te New Delhi-a MHA pisah an inbia. Inbiaknaa an thutlukna angin MHA kaihruaina hnuaiah buaina thlenna hmun Zophai chu Assam leh Mizoram sorkar aiawhte'n a hmunah an enfiah dawn.

Inbiakna hi Union Home secretary Rajiv Gauba-a'n a kaihruai a; Assam aṭangin chief secretary TY Das leh Mizoram aṭangin chief secretary Arvind Ray-te an tel. Arvind Ray hi Home department-a additional secretary Lalbiakzama leh OSD David H Lalthangliana ten an ṭawiawm.

Inbiak zawha MHA thuchhuah tarlan danin, meeting-ah hian Chief Secretary pahnihte chuan MZP-in Zophaia Zofate Chawlhbuk an sakna hmun chungchanga an sorkar dinnate an sawi a, remna a awm theihna atana an hmalaknate an sawifiah. Meeting chuan, buaina thlenna hmun chu state pahnihin kut an thlak loh ve vena tur hmun (status quo) atan puan an rêl.


Buaina chhuahna hmunah mipui punkhawm khap nghal a ni a; state pahnihte chu remna leh muanna a awm theihna atana hma la tura tih ve ve an ni.

Meeting-a an rel dan chuan, buaina chhuahna hmun hi chawlhkar khat chhungin MHA Joint Secretary (North-East) kaihhruaina hnuaiah Mizoram leh Assam sorkara Home secretary-te'n an tlawh ang a, Survey of India official-te'n an ṭawiawm ang. An thil hmuh chhuahte chu Union Home Secretary hnenah an thehlut ang a, Chief Secretary pahnihte inbiak leh hunah sawiho a ni tura tih niin, chumi zawhah Union Home Minister kaihhruaina hnuiah state pahnih Chief Minister-te an inkâwm leh dawn a ni.

Nimina Mizoram leh Assam chief secretary-te New Delhi-a an inbiak tur chungchang hi nimin khan Assembly House-ah sawi chhuah a ni. Chief minister Lal Thanhawla'n March 19, Thawhṭannia Assembly House-a a sawi, chief secretary pahnih inbiaknaah ramri chungchang sawi a ni dawn lo a, tuna buaina (present situation) chinfel dan tur an sawi dawn tih a sawi chungchang chu sawifiah turin MNF member Lalruatkima'n Home Minister a ngen.

Home minister R Lalzirliana chuan, March 20-a inbe turin Mizoram leh Assam chief secretary-te New Delhi-ah koh thlak an ni tih sawiin, "Boundary inchuh vanga koh thlak an ni," a ti a; Mizoram leh Assam-in state pahnihin boundary-a an pawmte sawi langin, "Ramri tak tak sawi hman a ni dawn lo a, present situation chinfel chungchang an sawi phawt ang," a ti.-Vanglaini

No comments:

Post a Comment

Post Bottom Ad