Ṭangrual pawl, Zoram Peoples Movement (ZPM) Steering Committee chu nimin khan an pisaah ṭhuin, ZPM hmalakna leh kal zel dan tur an ngaihtuah. ZPM Steering Committee chairman Lalliansawta chuan, Mizoram leh hnam chhanchhuak turin an bei zel dawn tih a sawi.
Lalliansawta chuan, Mizo khawtlang nun chhe mek te, HIV/AIDS leh ruihhlo hluar lutuk te, home hrang hrang tâwt vek maite chuan Mizoram dinhmun a hrilhfiah chiang hle tih sawiin, "Ramri buai chung chang te, kawngpui chhia te, ei leh bar te, Chakma foreigner leh zirna tlahniam chungchangahte hma kan sawn thei lo hle. Kan ram leh hnam chhanchhuak a, hmasawnna rahbi ṭha kan neih theih nan hma kan la zel dawn a ni," a ti.
Ram hmangaihna avangin mahni dinhmun leh nihna te, ngaihdan leh duh dan tam tak kalsana ṭanrual a ngai tih sawiin Lalliansawta chuan, "Mipui beiseina leh mamawhna kan hre reng a, Mizo takin, Kristian taka kan thawh a pawimawh. Pathian lamah kan ṭang em, tia kan inzawh fo a ṭul" a ti a; Mizoram mipuiin nghakhlel takin ZPM an thlir renga a hriat thu a sawi.
ZPM Steering Committee-ah hian hmun hrang hranga an pawl hmasawnna leh hmalaknaah lawmawm an tih thu an tarlang a, 'Ṭhenkhatin tawlailirte an ring a,
ṭhenkhatin sakawr an ring a, keini erawh chuan Lalpa hming kan lam a ni.' tih cháng vawna neia ṭhahnemngai taka thawk turin an infuih a ni. -Vanglaini
Post a Comment