MZP IN ZOFATE CHAWLBUK SAK ATUM Home minister R Lalzirliana chuan nimin khan MZP hruaitute a pisaah léngah a sáwm a, Bairabi Zophaia Zofate Chawlhbûk sa tawh lo turin a ngen. MZP-te erawh chuan, eng pawh huama chawlhbûk sak an tum thu an sawi thung. MZP hian chawlhbuk hi March 8, Ningani-ah sak leh an tum. Bairabi khawtlang chuan chawlhbuk sak ṭha an ti lo a, puih an tum tawh loh thu an sawi.

MZP hruaitute chuan nimin khan Aizawl Press Club-ah thuthar theh­darhtute an kâwm a; MZP president L Ramdinliana Renthlei chuan, Zofate Chawlhbuk sak an tum chungchangah Home Minister-in nimin khan a pisaah léngah a sawm thu sawiin, buaina chhuah a hlauhawm avangin chawlhbûk sa tawh lo tura a lo ngen thu a sawi.

MZP President chuan Home Minister hnenah hian, "Zofate Chawlhbuk sak chu Committee-in an lo rel tawh a nih avangin, eng pawh huama sak ngei kan tum thu kan hrilh a ni," a ti.

L Ramdinliana Renthlei chuan, February 27, 2018-a chawlhbûk an sak chu an ven loh laiin Assam police leh Forest department ten JCB hmangin a rukin an ṭhiat a, bungrua zawng zawng nen an lak bo vek thu sawiin, "Hemi zan vek hian Bairabi MZP hmingin Bairabi Police Station-ah FIR thehluh nghal a ni," a ti a; FIR chu police-in an bawhzui lo nia sawiin, mak an tih thu a sawi.

February 28, 2018 khan Bairabi MZP hruaitute'n chawlhbuk sakna bungruate zawngin Gurmura lamah an kal thu sawiin Ramdinliana chuan, "Bungruate hi Gurmura-a Forest department office kawtah an va hmu a, Assam police-in an ven avangin an la ngam bik ta lo a ni," a ti.

MZP President chuan, Zofate Chawlhbûk sakna hmun vela Assam sorkarin sikul a din te, police outpost an siam te, Bru raltlante awmna tur in an sakte leh Assam lamin huan an siam te, Vairengte leh Dholai inkar Mizoram chhunga field an laihte leh Vairengte auro-rickshaw stand bul Mizoram chhunga chenna in a sakte chu ngaimawha chhuahtir turin Mizoram sorkar an phût thu a sawi.

Ramri chungchangah sorkara thuneitute an mutthlûk reng chuan Mizo ṭhalaite'n an tih tur an ti zel dawn tih sawiin MZP hruaitute chuan, "Mizoram min chuhpuitu Assam lama theihtawp chhuahtute hi an zirlai pawlte emaw an tlawmngai pawlte emaw ni loin, sorkar a ni a, chuta an kut leh kê ber chu police an ni a, a rualawhthlak hle a ni," an ti.

Zofate Chawlhbûk an saknaa theihtawp chhuahpui a, tha leh zung tam tak sêngtu Bairabi khawtlang chungah thinlung taka an lawm thu sawiin MZP President chuan, "Chawlhbuk kan sak lehna turah pawh theihtawp min chhuahpui leh turin Bairabi khawtlang hruaitute leh mipui kan ngen nawn leh a ni," a ti a; chawlhbuk an sakna chu Mizote ta a ni tih an puan nawn thu a sawi.

L Ramdinliana chuan, nimin khan MZP hruaitute leh Bairabi-a NGO hruaitute chu Bairabi-ah an inkawm thu sawiin, "Inpawh tlang takin an meeting thei a, lungrual takin thil an sawiho thei a ni," a ti. 

Vanglaini palai zawhna chhangin Bairabi khawtlang hruaitute chuan, MZP-te'n chawlhbûk sak tlang tho an tum avangin, ngawi renga tih á¹­ha an tih loh avangin dawhkan kila an sawm thu sawiin, "Keini lam chu harsatna tâwk thei kan nih avangin sa lo se tih hi kan ngaihdan a la ni reng," a ti a; chawlhbûk sak kher chu sorkar auh einaah an ngai lo tih an sawi. 

Bairabi khawtlang hruaitute'n chuan, MZP-te'n chawlhbuk an sak an tum a nih pawhin dan an tum loh thu sawiin, "Tih tlang in duh chuan ti tlang ula, kan ti a. Mahse, keini chuan kan pui tawh lo ang," an ti. -Vanglaini

Post a Comment

Powered by Blogger.