- David Lalawmpuia
Mizo zinga lâr tak, Pathian mi hman Pu Chawngkhupa (L) kha Zoram dung leh vângah hre lo kan tlem khawp ang le. "Sipai gate paltlang nan rulngan a awrh a, vai sipai hoin an hlau a, an kaltlangtir" an tih kha kan hre țheuh âwm e.
Pu Chawngkhupa rul awrh kha "rulngan a ni lo" ka ti hauh lo a, mahse khaw hrang hrangah hian kan rul hming phuah a inan loh avangin King Cobra ni loin Black Krait zawk a nih ka ring tlat mai. A nih loh pawhin Ratsnake chi khat, Hlaidum an tih hi a ni ve thei tho bawk.
Pu Chawngkhupa rul awrh kha King Cobra ni ta se, a awrhtu hian a tifuh vak loin a rinawm.
1. King Cobra hian tûr hlauhawm tak an nei a, an tûr hi a inzatah chuan Monocled Cobra, Banded Krait leh Black Krait te aiin hlauhawm loh zawk a, mahse tûr a pek chhuah hnem êm avangin a chuk a hlauhawm ber a ni. Vawi khat chukah 4 ml te a pe chhuak thei a, sai puitling pawh a chuk hlum thei a ni. Hei vang hian Pu Chawngkhupa khan King Cobra chu a awrh a rinawm loh.
2. King Cobra hi an che rang hle mai a, Mizorama rul zingah chuan an che rang ber a ni. Tin, rul dang ei tura duan an nih avangin an chuk rang hle bawk. Pu Chawngkhupa khan King Cobra hi man tum ta se, a lo chuk ngei ang le.
3. King Cobra hi an kawlh hle mai a, Macclends Coralsnake te anga kutlâwnga khawih mai mai chi an ni lo. Khawih fuh vaih chuan min chukna chance a sang hle a, chuvangin Pu Chawngkhupa rul awrh hi chu King Cobra a ni thei lo ang.
4. King Cobra puitling hi 10 ft chuang an ni deuh zel a, 15 ft aia sei pawh an awm. An len bâkah an sei a, an rit hle bawk. Pu Chawngkhupa hian King Cobra puitling hi a awrh zawh a rinawm loh.
5. King Cobra hi man an harna chhan êm êm chu, chawngkawr ang maiin an ding ur ur țhin a, khawih ngam chi an ni lo. An inring lai man tum chu intihhlum tum nen thuhmun a ni. King Cobra puitling hi an sei dân azirin an ding sâng thei hle a, an taksa ⅓ lai an din theih avangin 15 ft a sei chu 5 ft a sângin an ding thei. Pu Chawngkhupa hian a man ngam kher lo ang.
Post a Comment