Vawiin chawhnu khan Lunglei Bawrhsap Pi Lalzarmawii, IAS hovin a Office Chamber-ah Pukpui to Tlawng kawng chhe siamthat Rigid Pavement hna kal mek chungchang sawihona meeting neih a ni a. He meeting ah hian EE PWD Lunglei Road Division Er Lalchhuana leh a thawhpuite, Lunglei SP Pu Lalthafamkima Jongte leh a thawhpuite, Lunglei Additional DC Pu Benjamin Lalzama leh sawrkar hotu dangte bakah Lunglei Sub Headquarters YMA hruaitute, Lunglei Thalai Pawl hruaitute leh Zoram Drivers Union (ZDU) hruaitute an tel.
Pi Lalzarmawii chuan World Bank Road chu Lunglei District mai bakah Saiha District leh Lawngtlai District mipuite mamawh chawkluhna kawngpui a nih avangin a pawimawh takzet a, “Kawng tha tak a rang thei ang bera kan neih theihnan inpawh tlang taka inrawn tawnin ruahmanna I siam ho ang u” tiin kalkhawmte thawhho puiah a sawm a. PWD hotute chu kawngpui tha tak, changtlung leh rintlak siam tura tan la turin a chah a ni.
PUKPUI TO TLAWNG INKAR KAWNG CHUNGCHANG MEETING NEIH A NI
Meeting-ah hian tha taka inkawmhona hun hman a ni a. EE PWD Lunglei Road Division Er Lalchhuana chuan Lunglei Thalai Pawl, YMA leh ZDU te zawhna chhangin Rigid Pavement siam hna kal mek chungchanga an hmalak dan leh hmachhawpte chipchiar taka sawifiahna hun a hmang a. PWD hotute hian an hnathawh kawnga an harsatna tawh te sawilangin helai hmuna vut a tam thu te, air compressor hmanga theihtawp an chhuah thu te an tarlang.
Lunglei Thalai Pawl, YMA leh ZDU hruaitute chuan hemi kawng siam chungchanga an ngaihdan leh thil hriat duh hrang hrang te sawilangin PWD hotute chu kawng siam hi uluk zawka vil turin an ngen a. Hmalak chhunzawm zel dan tur te pawh sawiho niin hun lo kal zel turah inpawh tlang taka thurawn inpek fo an intiam a ni.
Aizawl - Thenzawl -Lunglei Roadhi World Bank sum atangasiamniin kum 2011 khan hawn a ni. A kawng thui zawng hi 164.000 km a ni a,State Highway a ni. A zau zawng hi 7.45 m a ni a, a blacktop zau zawng hi 5.50 m a ni. Tlawng Lei hi 143.750 kmp ah a awm a, Pukpui hi 155.000 kmp ah a awm. Pukpui leh Tlawng inkar kawng chhe lai zual bik hmun 9 a Rigid Pavement Work hi ruahman niin hna hi a kal mek a. SLT Infracon leh Tantia Construction te heng hna te hi an thawk mek a ni.-DIPR
Post a Comment