CAPT. FRANCIS MALSAWMKIMA PACHUAU
- Sipai (GD) a tang chunga lehkha zir chhunzawm a, Officer-a inziak tling thei.
- High School a kal laia English a thiam loh lutuk avanga hremna tawk thin!
- Duty-na hmun, electric eng hnuaiah pawh lehkha zir thulh chuang lo chu!
FAMILY BACKGROUND
Capt. Francis Malsawmkima Pachuau hi kum 1986 March 16 khan Rullam-ah a lo piang a. A pa Lalhnuna Pachuau (L) leh a nu Lalhmachhuani-te hi lo nei a eizawng an ni a, unau pasarih (mipa 4 leh hmeichhia 3) an ni. An chhungkua hi Francis-a sipaia tlin hnu deuh, kum 2008 khan Bawngkawn South-ah an pem a. Amah Francis a erawh hi chu kum 2011 khan Agathy Lalbiakmawii nen inneiin Maubawkah indangin an khawsa mek a ni. Fa pahnih, hmeichhia ve ve an nei tawh bawk.
EDUCATION BACKGROUND
Primary School leh Middle school hi Rullam-ah a kal ve nawk nawk a. Hetia Rullam-a lehkha a zir lai hian an chhungte, Shillong-a awm mekten an hnena lehkha zir turin an la thla a. Shillong-a a awm tirh hian a ni thingtlang naupang, English a mik a mak pawh hre lo chu a talbuai nasa thin hle a. An zirtirtute thusawi a hrethiam lo fo a, chu chuan naupang luhlul tak anga lan tirin, hrem pawh a tawh phah fo a ni.
Matric hi Shillong a HL Mizo High School, Happy Valley atangin kum 2000-ah khan 45% hmuin a pass a. HSSLC erawh chu a sipai tan hnuah, kum 2006 khan sipai zirna, HRTC (CBSE) atangin 54% hmuin a pass leh bawk. Principal hriatthiamna sang tak hmangin Aizawl North College (ANC)-ah admission a tih chhunzawm leh a, chhuti a a lo chhuah changa a theih ang anga class kal vein, kum 2014 khan BA chu 56% hmuin a pass ve leh ta a ni (BA zir tur hian admission vawi thum zet a ti hman ie. IGNOU, ANC).
SIPAIAH A TANG
Chhungkaw harsa tak atanga seilian a nih avangin hlawh neih thuai a, chhungkua chawm a duh avangin kum 2004 khan Assam Regiment-ah a lut ta a. Hetia sipai lumum, general duty-a a luh hnu pawh hian sipai officer nih tum tlatin, lehkha zir a chhunzawm zel a. Sipai a atan hnu hian pistol kah a thiam riau avangin an hotuten pistol kah lama insawrbing turin an buatsaih a, India ram a pistol inkahsiakna hmunpui, Mhow, Madhya Pradesh-ah an tir a. Amaherawhchu, pistol kah ringawt chu a thiam chungchuang nih loh chuan dinhmun sang zawk thlenna chance a tlem zawka a hriat avangin a bansan a. Officer nih ngei tumin zirna lam a luhchilh chho ta zawk a ni.
OFFICER ZINKAWNG
Army Cadet College (ACC) kaltlanga Officer-a luh tumin vawi 3 exam a bei a, written paltlang ve thin mah se, UPSC interview-ah a tla zel a. Hetianga a beih lai pawh hian sipai lama an hotu thenkhat phei chuan “Sipaiah hian lehkha zir tura lut em ni i nih?” tiin hmusit takin an tawngkhum fo thin. Mahse, heng hlawhchhamnate leh hmusitna karah pawh hian a beidawng duh chuang reng reng lo a. Hunawl remchang a neih apiangah lehkha a zir a, zan lama an duty pawhin duty-na electric eng hnuaiah lehkha chhiar zawk zawkin, teikual pahin a byeheart belh zel thin. A bikin English a zir nasa a, a phone neih chhun, voice tlemte record ve theihna chu tangkai taka hmangin, English a practice a, a record a, ngun taka ngaithlain a English hman dan dik lo leh hmasawn ngaihna laiah a insiam tha chho zel thin. English a hmasawn duhna vang liau liauin hetih lai hian a diary pawh English hlirin a ziak lui thin a ni.
OFFICER-AH A TLING TA
Hetianga beidawng lo a ngawrh taka a beih hnuah kum 2014 July thla khan SSB (Staff Selection Board) hnuaia Special Commission Officer (SCO) exam-ah a tling chho ta nge nge a. He a inziah tlinna SCO hi a hautakin, tling an tlem thin hle a, Mizo zingah phei chuan hemi kaltlanga sipai officer-a inziak tling thei hi sawi tur an la awm meuh lo niin a lang. Officer Training Academy, Gaya-ah training tanin, kum 2015 December thlaah training an zo a, 33 Medium Artillery, Parikot, Punjab-a awm chu Leautenant niin a zawm ve ta a ni.
UN Mission a kal tura an Unit thlan an nih avangin kum 2017 atangin UNDOF (United Nations Disengagement Observer Force), Israel leh a chhehvel a remna leh muanna kengkawh tura UN sipai dahte chu an zawm ve ta a. UNDOF hnuaiah hian Ireland, Fiji, Nepal leh India sipai an awmkhawm a, Israel-in Six Day War-a Syria ram atanga a lak, a awp zui tak Golan Heights hmun hmingthang takah an awm a ni. Amah bik hi UNDOF hnuaia UNIFIELD an tih maiah Liaison Officer-a dah niin, Lebanon leh Israel ramri-ah a duty thin a ni.
Hetia UN Mission hnuaia a awm lai hian December 2017-ah Leautenant atangin Captain-ah a kaisang zui ta nghe nghe. UN Mission atang hian May, 2018 hian an lo chhuak tura ngaih a ni.
(UN hnuaia India sipaite an kal hian India rama an hlawh bakah Officer chinin US dollar 2200 vel an hlawh a, JCO-in dollar 1700 vel hlawhin, GD-in dollar 1300 chuang hret an hlawh bawk. He thu buatsaih lai hian US dollar 1 leh India pawisa Rs. 65 vel a intluk tawk avangin UN hnuaia Officer-te thla khat hlawh hi Rs. 1,43,000/- vel a ni dawn tihna a ni. India rama an hlawh nen chuan thla khatah nuai 2 chuang fe an hlawh dawn tihna a nih chu.. – Ed)
ISRAEL HO DANGLAMNA
“Israel ho danglam em emna chu, an duty reng reng an serious em em zel khu a ni. A hun takah engkim an ti thlap thlap zel..hei hi an hnama an chian em vang niin a lang,” a ti. “Tin, an hmeichhiate pawh khu combat area ah, inbeihna hmunah pawh an duty ve vek a, mipa leh hmeichhia inthliarna a awm ve meuh lo” a ti bawk. Israel ho inawpna felfai dan sawiin, “Kalphung duan sa fel tak an nei a, thil engpawh lo thleng se,a chhanlet dan tur engkim ruahman lawksa vek a nih avangin hotute rawn kual kher a ngai ve lo. Beihna an tawh pawhin minute tlemte chhungin jet fighter nen an chhanglet nghal zat zel” a ti.
MIZO THALAITE A V EI
Mizo thalaite serious lo lutuk hi a vei hle. Aizawl North College-a class a kal ve zauh zauh changin Mizoram a College zirlaiten an zirlai leh career an ngaihtuah tawk loh zia a hrechiang hle a. Lehkha zir reng rengin miin min zawt leh dawn a, tute bulah emaw kan sawichhawn leh a ngai dawn a ni tih ngaituah ran chunga zir hian thiam a awl bik niin a hria a. Chutiang tur chuan Mizo zirlaiten lehkha zir thin se a duh hle. Tin, Officer ni turte, hlawhtling turte hian lehkha thiam theih kher a ngai lo a, a fight nasa apiang, midang hnen atanga zir hreh lo apiangte tan hlawhtlinna kawng a inhawng niin a ngai bawk.
Source- HILLSGATE
Post a Comment