Young Lai Association (YLA) chuan April 4, 2018 zan aṭang kha Thingkah khelmuala 'Phunchong Runah' inkhawmpui an hmang a; Ningani zan khan Lawngtlai West bialtu MLA C Ngunlianchunga leh Lawngtlai East bialtu MLA H Zothangliana ten an hmanpui.
C Ngunlianchunga chuan, Lai rama tlawmngai pawl lian ber YLA-in ram leh hnam hmasawn nan theihtawp chhuah zel se a duh thu sawiin, "Khawmpui thupui 'Ram leh hnam humhalh' hi thupui pawimawh tak, ngaihthah thiang lo a ni a, YLA hian thapui thawha a bawhzui ngei ka beisei," a ti.
Ram leh hnam humhalh turin mahni ṭawng humhalh leh hman uar te, mahni hnam inthuamna chawi lâr te, mahni intodelh, rinawm, taimak, tawrhchhel, tumruh leh nun uluk a ngai tih sawiin Ngunlianchunga chuan, "Pawn lam aṭanga chîmralna ai chuan mahni leh mahni intihchhiat a hlauhawm zawk," a ti a; mahni intihchhiat chu hnam ralna bul a nih thu a sawi.
Young Lai Association (YLA) Inkhawmpui
H Zothangliana pawhin thu sawiin, pi pute nun mawi tam tak chu ṭhangtharte’n an thlauhthla tial tial niin a sawi a, "Aia upa zahte pawh inzirtir thar a ṭul hle. Sum ngainat leh duhâm lutuk avangin ram hmasawnna a ṭhuanawp phah thei. Ram leh hnam humhalh nan sum ngainat lutuk lohte zir a ngai. Ram siam ṭha tur chuan a bul ṭan nan mahni insiam ṭhat phawt a ṭul," a ti.
YLA inkhawmpuiah hian Lai hnam tihmingṭhatu mi pali hnenah chawimawina hlan a ni a, mi eng emaw zat hnenah YLA life member nihna hlan a ni bawk.
YLA-ah hian member 46,252 an awm mek a, Central YLA hnuaiah sub-headquarters pali, group pariat leh branch 107 a awm a ni.-Vanglaini
Post a Comment