MBBS ZIRNA SEAT 100-IN MIZORAM MEDICAL COLLEGE (MIMER) ṬAN DAWN

MBBS ZIRNA SEAT 100-IN MIZORAM MEDICAL COLLEGE (MIMER) ṬAN DAWN

" Mizoramin mel lung pawimawh tak a phun a ni,"

-Pu Lal Thanzara, Health Minister

Aizawl, 11.05.2018: Medical Council of India (MCI)-in Mizoram Institute of Medical Education & Research (MIMER) din a phalsak tak avangin nimin May ni 10, 2018 khan college bul ṭan dan tur rel a ni a. Health Minister Pu Lal Thanzara hovin Chief Minister’s Conference Hall-ah hemi chungchang ngaihtuahin mi pawimawhte an ṭhukhawm.

Health Minister Pu Lal Thanzara chuan Mizoram nghahhlelh em em medical college, Mizoram Institute of Medical Education and Research (MIMER) chu Medical Council of India (MCI)-in a pawmpui tak avanga lawmthu sawiin Mizoramin mel lung pawimawh tak a phun a ni, a ti. He medical college hi a bul thum aṭangin a ṭha thei ang bera din leh enkawl zui ṭul a tih thu sawiin a hlawhtlin nana tha leh zung, ngaihtuahna sengtu zawng zawng chungah Minister chuan lawmthu a sawi a ni.

Mizoram Medical College (MIMER): MBBS seat 100 awm turah seat 15 chu Government of India thu angin Central Pool Qouta ah dah a ni dawn a. A bak 85 chu Mizoram sawrkar kutah dah a ni a. Committee hian seat sem dan tur, zirlai lak dan tur, prospectus siam dan tur leh a kaihhnawih ngaihtuahtu sub-committee chu Health & Family Welfare Joint Secretary Pu R.Lalchhanhima kaihhruaina hnuaiah a din nghal a ni. Medical College a fee bithliah tu tur, Committee for Fee Fixation pawh din nghalin MCI-in a phut anga Justice retired ngei dah a ngaih avangin Chairman-ah High Court Chief Justice (Rtd) T. Vaiphei hming chu rawt a ni a. Kum 2018 NEET-UG counselling neih hma ngeiin fee structure hi bithliah fel tur a ni.

Inkhawmah hian Faculty mamawh la hnawhkhah loh, lak thuai dan tur te, boys and girls hostel ruahman dan tur te, State budget atanga Central Animal House sak dan turte, Blood Bank Officer chungchang leh venhimna lam kaihhnawih thil pawimawhte an sawiho a ni.

Comm News