Thawhlehni (8.5.18) khan ZPM ( Zoram Peoples' Movement ) Party chuan Aizawl Chanmari YMA Hall ah Chief Ministerial Candidate puanna an nei a, ZNP President Lalduhawma chu Chief Ministerial Candidate atan an puang.

He inkhawmah hian ZPM Chief Ministerial Candidate Lalduhawma chuan Mizoram chhung District Khawpui hrang hrang atanga ZPM hruaitu kalkhawm te atanga zawhna an siam te chhanna hetiang hian a nei.

Mizoram chhunga kawng siam that dan tur zawhna siam ah hmanraw chang kang ber ber hmanga hnathawh tum a ni ang tih sawiin Kawng siam hna te chu Kum 10 atanga 15 daiha siam a nih tur thu a sawi. Lalduhawma chuan Sawhthing hralhna chungchang zawhna chhangin a rate hre sain loneituten an ching ang tih sawiin Rs.50/- in hralh a ni anga, a chin dan thar Permanent Farming kan ngaihtuah ang. Hmunphiah pawh Rs.100/- in kan lei anga hmunphiah chingtu/hralhtute chu chhiah awl an ni ang a ti.

Power chungchang ah Bairabi khuah kan tum angem tih zawhna chhangin Lalduhawma chuan ZPM chuan Power Policy tha kan nei tawh a, Bairabi(Tlawng lui) chu kan khuap ang. Tin Tuivai pawh kan ennawn anga, tuna Sorkarin Project 9 zet Company te MoU a sign pui hi kan cancel ang. Kan Sorkar term 1 chhungin Power a intodelh hi ZPM chuan kan tiam a ni a ti. Thalaite tana khawvel thar siam dan tur zawhna chhangin, ZPM chuan hei hi a hranpa in kan duang tawh a ti a, " May We Help You" tih Policy hi kan kalpui dawn a, Job Counciling te, Export te, kan ngaipawimawh ang. Tin, bul tanna tur kan siam ang a, Loan an puk theihna tur te thalaiten kan ramchhung ah ngei contract hna lian an thawh theih dan tur te National, International thlenga Contract an thawh theih dan tur te kan ngaihtuah ang a ti.
Mizoram lalduhoma chief minister
Zu zawrh chungchanga zawhna a chhanna ah Lalduhawma chuan kan zuar chhunzawm lovang a ti a, Zu zawrh hi kan la tlin lo, hei mai hi nilovin zu zawrh hi kan ram sum runtu a ni a, a hlawkna kan tel ve hi tlem te chauh a ni a, a teltute chu hnamdang an nih avangin kan titawp ang. Ruihhlo ngaite hmakhua thuah WHO nen tangtlangin hma kan la anga, Excise Act hi kan siam tha ang. NGO ten ruihhlo dova nasa taka hna an thawhna ah thuneihna an nei lova, thu an neih theih nan Dan hi ennawn a ni ang Lalduhawma chuan a ti.

Development kalpui dan tur zawhna chhangin Lalduhawma chuan Brig. T. Sailo hmalakna Sixth Basic Need chu ngaihpawimawh an tum thu sawiin, Mizoramah hian WRC siam theihna ram tur survey tawh ah a zau hle a, mi nuai 44 kham khawp tharchhuah theihna a ni a, hei hi kan ngaipawimawh dawn tiin, mipuite mamawh tui in tur tha leh thianghlim, Chenna In neilo te ngaihpawimawh, eizawnna mumal neilo te tan eizawnna tha ngaihtuahsak, Gas hnianghnar, Transport & Communication, hriselna lam ngaihpawimawh a nih tur thu bakah RSBY hnuaiah Rs.nuai 5 thleng bill theihna tur siam te leh Zirna tha neih te chu an ngaihpawimawh tur leh hemi hmanga hmasawnna kalpui a nih dawn thu a sawi.

Lalduhawma chuan an Sorkarah eng kalphungthar nge tih leh Mipui Sorkar an siam dan tur zawhna chhangin a chunga kan sawi tak te khi kan danglamna tur kalphung thar a nih dawn bakah a dang tam tak a awm tih sawiin, hamthatna leh duhamna a awm ve lohna turin Val Upa kaihhruainain kan kal dawn a, Major Project ah EPC, DPC te hman kan tum ang. Contractor ten a hun takah an hna an zo tur a ni a, corruption awm theihna Revise Estimate tihbo a, hlemhletna kua hnawhpin a ni ang a ti.

Lalduhawma chuan Chief Minister a ni ve a nih chuan Development Portfolio a chelh ve loh tur thu sawiin, Minister te vil a mipuite tana hnathawktu nih a tum tih sawiin, an Sorkar chuan Thumrawn Policy an kalpui dawn tih a sawi a, Right to Public Service Act hman a ni anga, langtlang Sorkar dinin VIP Culture nuai bovin Mipui Sorkar kan siam ang Lalduhawma chuan a ti.

A THUSAWITE HI CM NI TA SE A UM PHAK ANGEM LE ?

@Rdl Khiangte

Post a Comment

Powered by Blogger.