Thenzawl lirthei accidentNimin Ningani (Ni 10.05.2018) tlai (thim dawn hnaih, thimhmul)dar 5:30 vel khan Thenzawl chhim lam kawtchhuah, Thenzawl Lunglei World Bank kawng, Tantia Construction Company ltd. Office kawtah Siaha aṭanga Aizawl pana tlan Sumo, TBC Family - MZ-03-4848, motor neihtu leh driver ni bawk Pu TBC Lawmzuala, Aizawl Republic Veng khalh, Siaha aṭanga Aizawl pana tlan chu Mizoram PWD Truck thar, TATA 911, Aizawl aṭanga Lawngtlai Division a dah tur Lalhmelṭhaa s/o Sawngkaraia, Buhchangphai, tuna Dawrpui Vengthara mi inhnuai luaha khawsa mek khalh chuan na taka Sumo ding lam, driver side lamah suin, he Sumo seat hnung ber, seat no. 10, tukverh bula ṭhu Pu K. Lalremruata kum 38 h/o K. Nahli, New Siaha, PWD Bualpui NG Sub-Division a Muster Roll hnathawk lai chu a hliam tuar lovin a boral. Vanduaina tawk ta Pu K. Lalremruata leh hliam tuar dang mi 3 te chu Thenzawl CHC ah hruai nghal an ni a, Pu K. Lalremruata hi motor insut hlim aṭanga nikhawhrelo a awmin, Thenzawl CHC thlenpui anih hnu hian a hliam tuar lovin a boral nghal. Passenger zingah hliam tuar mi 3 te chu Thenzawl CHC ah hian first aid pek an ni a, ngaihtuahawm an awm lo.

THENZAWL-A ACCIDENT CHUNGCHANG, KIMCHANG

Sumo sutu 911 Mizoram PWD Truck thar hi nimin chawhmaa PWD Minister Pu Lal Thanzara'n lirthei thar a vailiam tak zinga mi kha niin, a khalhtu Lalhmelṭhaa hian Zu a rui a, a tlanchak viau bawk nia sawi a ni (amah chuan Sialsuk khaw daiah Beer cane 2 leh zu no 2 a in niin a insawi), Sumo hian an hmaa Truck lian tlan hi an hmu a, kawng chhak sir ah an tlan a, Truck hian han su ta thoin, Sumo a sut hnu hian kawngpui thlang lama awm Tantia Company Bolero MZ-09-0195 chu kawngthlang leiletah a su thla a, Tantia Company Generator lian pawh a su chhe bawk.

He chhiattawhna hriat anih ve leh hian Thenzawl Police te chuan thil thlendan a hmunah enfiah nghalin, Truck khalhtu Driver hi an la nghal a, dan pangngai anga thubuai(Case) siamsakin, vawiin chawhma khan Thenzawl Police ten Serchhip Court ah an hruai a ni.

Thenzawl Joint YMA te chuan a ṭul angin chhiattawkte hi an buaipui a, Pu K. Lalremruata hi Kuang siamsakin, nizan dar 1 vel khan Siaha lam panpui a niin, vawiin hian New Siaha ah vui a ni (ang).

Pu K. Lalremruata hian fapa 3 leh fanu 1 neiin, an fapa Divine School, Aizawl a Pawl 7 zirlai, Hostel a awm tlawh tuma a nupui leh a fanu naupang ber nena Aizawl lama kal hi an ni a, hetiang vanduaina hi an tawk ta a ni.

( TBC Family Sumo khalhtu leh neitu ni bawk hian kum 10 chuang a khalh tawh a, nimin khan a ṭhianpa sumo, Siaha to Aizawl service ve tho, Sang Sang Sumo chu a ke lam kaihhnawih fel zan loh vangin, Mualṭhuam North aṭangin TBC Sumo nen hian zawimuanga kalin, an rawn inchhawm a, chetsualna hmun an thlen hian a hmaa tlan Sang Sang Sumo hian chak taka Truck lo tlan in a sut loh nan kawngchhakah a hel thei hram a, TBC Family Sumo hian vanduaina an pumpelh ve thei ta lo a ni. Truck Driver Lalhmelṭhaa hi PWD Truck thar, Lawngtlaia dah tur a ni a, Truck hi daily rate (Rs. 1000) hlawh a khalh tura PWD hotuten an rawih nia thudawn a ni. Smah chauhin Truck ah hian a chuang a ni.)

Helai Truck leh Sumo insutna bawr velah hian tunhma aṭangin chetsualna a lo thleng zauh zauh tawh a. Thenzawl khawchhunga World Bank kawng kan tih mai hi a kawng a zalin, a mam ṭha a, lirthei an tlan chak ṭhin hle a. Chhiatna leh vanduaina a thlen zel loh a, mipui him zawk nan Thenzawl khawchhung hmun engemawzatah hian Speed Breaker siam a ṭul hle niin a lang.

Liantluanga Renthlei, 
Editor, Vantawng Newspaper & Stinger 
DDK, Thenzawl

Post a Comment

Powered by Blogger.