SUAL I HUA ANG U (Thufingte 8:13)

— John Lalruatliana Kulikawn West Branch

Hruaitu hmasaten an lo duan, KTP member atana kum bithliah kum 14-40 chu Pathian malsawmna avangin kan lo bang liam ve ta reng mai. A va lawmawm em! Chutih rual chuan a khawharthlakin a lunglenthlak dawn hle mai. Amah Tirhkoh Paula tawngkam takin, keini a hun lova piang, nupui fanau neih duah tawh hnua inhmang ve lehte tan pawh, Pathianin kan phu loh rawngbawlna ropui tak tak min lo ruatsak ve te kha ka va ngaihlu em! KTP hi awm lo sela chuan vawiina ka dinhmun (Eng mah phei chu ka ni chuang hauh law) hi ka phak lo hle ang. Chu vang chuan, Zoram thalai tana tisa leh thlarauva than lenna hmun tha ber chu KTP hi a ni, ka ti ve tlat a ni. 

Aw le, kan thupui lamah lut dawn tawh ila. Kum 2016 KTP General Conference, New Champhai Field-a neih tum khan kan thupui hi Kum Puan Thupui atan Kulikawn Bial khan kan theh lut a, rorel palai zingah pawh duhtu kan awm nual nachungin tuna kan hman mek – 'Thlen chin atanga hmasawn' tih hi kan thlang ta zawk kha a ni a, kan mamawh tak zawk pawh a nih a rinawm. Mahse, rilruah a riah ve reng avang leh, KTP member mai ni lo, ram pum huap pawha kan mamawh ngei nia hriat a nih avangin, tunah hian point tlem tein han luhkhung ve dawn ta ila. Tin, kha General Conferenceah khan khatih laia kan Synod Moderator, Rev. H. Lalrinmawia pawh khan Zirtawp zan vantlang inkhawmah a rawn sawi nghe nghe a nih kha. 

“SUAL i hua ang u,” han tih ngawt chu a thu a bung viau thei a. Tin, sual kan tih chin leh sual kan hrilhfiah dan pawh a inchen lo zung thei a ni. Tun tum atan chuan heti hian han sawi fiah dawn ila – Pathian nena min len duntir thei lotu, tisa leh thlarauva kan than lenna atana hnawk, vanram min kai lohtir theitu zawng hi sual ti ila, kan chiang tlang viau awm e. Keini rawngbawl tura chhandam thalaite hian, he khawvel hmasawnna thang duang em em leh changkang taka kan len mek lai hian sual nen hian kan inbei reng a ni tih hi i hre reng ang u. Kan duh zawng tak leh kan chak/ thlakhlelh zawng tak, mahse, Krista Chanchin |ha nena inmawi hauh si lo hmangte hian beihin kan awm reng a ni. Chu vang chuan engtin nge chu sual lakah chuan kan din khawchhuah anga, engtin nge kan hmachhawn tak ang? Engtin nge kan member-pui sal tangte hi kan chhanchhuah theih tak ang? Heng zawng zawng kan hneh theih dan tura kawng awm chhun leh tha ber chu 'Sual huat' hi a ni. 

Jail tang pakhat chuan a tânpuite hetiang hian a fuih a: "Vawiina min hmangaihtu leh kan hmangaih ngawih ngawihte bula min awmtir thei lotu, hrehawm taka min awmtirtu, mite hmuhsit, endawng leh tihkhaia min siamtu 'Sual' hi i hua ang u," a ti tawp a ni! Tichuan, SUAL kan tih tam tak zinga langsar zual hi keini thalaite tana hnawksak, kan huat zual turte tawi tein han tar lang leh ila: 

1. Mipat hmeichhiatna (Sex) : Kan hriat vek tawh hnu hi sawi thar a ngai leh thin. Mihring nihphung pangngaiah chuan tisa châkna hi a awm vek a; mahse, a nih dan tur lova hman chuan SUAL lian tak a ni. Pathianin nupa kara chi inthlah pun nan, nupa inhmangaihna tihpun nana min pek a ni. Rawngbawltu tam berte leh thalai tam berte tlukchhiatna tam ber chu mipat hmeichhiatna hman dik loh hi a ni. Tunlai khawvelah phei chuan mipat hmeichhiatna mai ni lo, mipat mipatna leh hmeichhiat hmeichhiatna te hi a va hluarin a va tlangnel ta em! Kan Bible nen a inkalh bawk si. Pathian hre ngai lo hnam/ram ang mai kan ni ta! Tunlai dan hi kan ngaihhnathiama, kan ngaihzam telh telh chuan kan ram hian kan la tuar hle dawn a ni. HIV/AIDS kai thar an pun chakzia lah kan hai si lo. Sex video leh thlalak sexy tak tak lah chu en peih athu a ni tawh mai si. Chu vang chuan, nupui pasal kan inneih hma hi chuan keini KTP member-te hi chuan kan bungbel hi vawng thianghlim ila, he SUAL lian tak hi i haw rih phawt ang u. Chu chu nakina kan lawmna tifamkimtu a la ni dawn a ni. 

2. Ruih theih thil (Zu leh drugs) : Ruih theih thil hi a va buaithlakin ava huatthlala tak em! Pathianin mihring min din dan leh ni tur anga min duan dan ni phak lova min siamtu chu ruihhlo hi a ni. Chhungkaw tam tak min rûmtir vawng vawngtu, hmeichhe âwm nêm zawk leh naupang pawi sawi lote tithlabara tuartirtu, sum leh pai tul lova nasa taka min sentirtu, hriselna tithuanawpa, dam hun tur pawh dam thleng lova hma taka mual min liamtirtu, a nih loh leh piangsuala min awmtirtu he ruihhlo hi kan huat a ngai ngawih ngawih a ni. Ruihhlovin a man tawhte chu a thlah mai mai tawh si lo va, chhungkuaa theihtawp chhuaha beih pawhin awmzia a awm mang lo a ni. Chu vang chuan i hua ang u. Kan ramah phalna neiin zu zawrh a ni a, a duh tan chuan kan kawtkai maiah duhthala lei tur leh in tur awm a. Damdawi lam lah ‘Tun hma zawng aiin a tlawmin a tam zawk’ te an la ti lehzel bawk a. Hengte hi kan ram dinhmun a nih si chuan, keini KTP zingah pawh ruih theih thil hian bu a khuarin a man beh kan awm awm si a. Theihpatawpa heng ruihhlo leh a kaihhnawihte hi kan huata, kan dodal loh chuan kan ram hi kan dam khawchhuak zo lo mai ang tih hi thil hlauhthawnawm tak a ni. A man beh mekte chhanchhuah leh enkawlna kawngah pawh hian \an kan lak a ngai hle. Tawngtaina nen theihtawp i chhuah zel ang u. 

3. Mahni nun : Luka 14:26 kan chhiar chuan, “...ama nun nen lama huat loh chuan ka zirtir a ni thei lo vang,” kan Lal Isuan a ti a. Mahse, mahni nun han inhuat ngawt mai chu a mak awm hle mai! Mahni tawka fel leh tha, tling leh dik inti vek mai mihring kha kan ni a. Mahse, chiang lehzualin, a enna khawl hmang ngatin han inen ta ngat ila chuan, kan duh vang reng pawha kan neih ni lo – khâkna te, elrelna te, itsikna te, chapona te, duhâmna te, mahni hmasialna te hi kan ringtu nunah hian a va hnawksak em ve aw! Hengte hi kan huata, kan khen beh/ hmeh mih nghal zel loh chuan kan rawngbawlna mi tithuanawptu a ni dawn a ni. 

Vawiina kan ram hmakhua a thim riauva kan hriatna chhan ber pawh eng dang vang a ni lo – mahni hmasialna leh duhâmnaa kan khah hlawm em vang leh keimahni kan inhmangaih bik luat vang hi a ni. A tawp berah chuan, Mosian rei lo te atana sual nawmna hlimpui ai chuan Pathian mite nena tihduhdah tuar a thlang zawk ang hian, keini KTP member-te hian kan sawi tak (Kan sawi chiah lohte pawh) sual nawmna nia lang hi kan Pathian duh loh zawng a ni tih hriain, SUAL hi haw ngamin, i haw phal ang u! “Thih thlengin rinawmin lo awm rawh; tichuan, NUNNA lallukhum ka pe ang che,” Lal Isuan a ti si a. 

Pathianin a thu malsawm rawh se. AMEN.

Source: Kristian Thalai