MNF president Zoramthanga chuan nimin khan Mizo Hnam Rûna inkhawmah Chakma Autonomous District Council (CADC)-a BJP leh Congress party-in sorkar an siam tak chungchang a sawi a; Congress party chu an huat ber leh an beih nasat ber BJP hmaah an kûn ta niin a sawi.

Zoramthanga chuan, Congress party chu India ramah nasa takin an tlachhia a, India rama state 29-a inthlannaah an tla zel tih sawiin, "He laia an bupui Chakma area-ah pawh an tlakchhiat leh tâk zel avangin an zâm ta lutuk a, an huat ber leh an lo beih nasat em em ṭhin BJP hmaah an va kaikûn ta ringawt mai a ni. BJP hian an tih âwm tak an ti a, dem lutuk tur an ni lo e," a ti.



CADC-a Congress leh BJP thawh dun chungchanga Congress president Lal Thanhawla thu sawi danah Zoramthanga chuan, "Insawi mâm a ṭul tâk em avangin Congress hotupa ber pawhin 'Mizorama kan thawhpuite hi chu Hindu BJP an ni lo a, Buddhist BJP chauh an ni e' tiin, Hindu BJP hlauhawmzia leh Buddhist BJP an hlauhawm lohzia a sawi ta vak a, BJP bathlar aṭanga pêt chhuah loh hlawh nan chuan hetiang záwnga a sawi mai hi a lo ṭul ta a ni," a ti a; Congress President thu sawi chu mipuiin an hriatthiampui a ngaih thu a sawi.


MNF President chuan, tunlaiin tute emaw phone-a an inbiak rûkna pût rû chungchangah sawi a tam nia sawiin, "BJP sawisela duh lo viau anga lan tum si, thawhpui an lo châk ru hle si ni âwm a ni a. Nakinah chuan insawi mâm nan 'Hindu BJP a ni lo, Buddhist BJP pawh a ni lo, Mosolman BJP chauh a ni' an la ti zel duh ta ve ang," a ti.-VANGLAINI

Zoramthanga chuan, "Kan khing­puite hi an chesual nasa tawlh tawlh a, kan khingpuite chetsualna hian MNF hi min chawikâng zual zel a ni," a ti a; Congress party chu an din­hmun a chau tawh hle niin a sawi.

Post a Comment

Powered by Blogger.