Mizoramah hian rul chi hrang 60 vel an awm a, chungte chu hlawm lian deuh deuh pathumah a then theih ang.
1. TUR NEI LO (Non Venomous Snake)
Mizorama rul awm chi tam zawk hi tur nei lo an ni. Heng ho chuk (seh) hi chu ngho an neih loh avangin a hmuamhmaah rul ha thla a intlar that thin tlangpui. Tur an neih loh avangin enkawl tehchiam a ngai lo. A tuartu ngaihthatna a nih erawh chuan Tengtere mu bel, Pawisa thir bel, Ar mawng hip tir, Vakep hnah tui sawr, Changel tui in, Changela perek vih bur, Thingthu lehlin, Kezungpui lachhum sena tawn adt. a pawi lem lo. Tih loh pawh a pawi lem lo. Amaherawhchu a hmuamhma ah infection a awm theih avangin fimkhur a tha, Tetanus injection lak tal a tha. Tin, rul chil hi taksaa a luhin allergic reaction a awm thei tho a, na them thum, thak, vual, thip adt a awm thei tho. Ngaihthah lutuk tur a ni lo.
2. TUR HLAUHAWM LOH (Mildly Venomous Snake)
Rul thenkhat hi chuan tur an nei ve tho a, mahse mihring thihna tham chu a ni lo. An chukna lai a thi, na, vung adt a awm thei a, hlauhthawnna avangin lungphu rang, thawk harsa emaw pawhin an awm hial thei. Hetiangah hi chuan thlamuan a pawimawh ber mai. A tuartu ngaihthat na anih phawt chuan Tengtere mu bel, Pawisa thir bel, Ar mawng hip tir, Vakep hnah tui sawr, Changel tui in, Changela perek vih bur, Thingthu lehlin, Kezungpui lachhum sena tawn adt. a pawi lem lo. An ngaih a that phah miau avangin an dampui nghal sawt sawt thei an ti. Enkawl lem loh pawhin a septic te a nih ngawt loh chuan mihring tan thihpui tham a ni lo kan tih tawh kha.
Ngaihthah tur a ni lova, a tul angin nachhawkna pek a pawi lo. A septic loh nan antibiotics course khat tal lak a tha. Mihring kan in ang lova, allergy nei nasa ah chuan allergy damdawi Avil injection etc pek a pawi lo.
3. TUR HLAUHAWM (Deadly Venomous Snake)
Mizoramah hian Rul tur hlauhawm nei, mihring thihpui tham tur nei hi chi hrang 10 hriatchian a ni tawh, chung te chu.
i) Rultuha. ii) Rulnghawngsen. iii) Rulnghawngeng. iv) Rulmuk. v) Rulthinghar. vi) Rulthihna. vii) Chawngkawr. viii) Rulngan. ix) Chawnglei/Tiangsir. x) Khuavangrul
Rul tur nei chuk hi chi thumah then leh theih a ni a, hetiangin :
Tur thun lo (Dry bites) : An tur an thun loh avangin a hlauhawm lem loh. Sawi thui vak a ngai lo ang chu maw.
Tur thun tam lo (Non Lethal Dose) : An tur hlauhawm mahse an tur an thun tam loh avangin mihring thihna a thlen lem lo.
Tur thun tam (Lethal Dose) : Mihring thihpui tham tur an thun hi a hlauhawm ber chu a ni. Hetiang hi Mihring tan huatloh a awm thei lo. Hetah hi chuan Tualchher damdawi hmantlak hriat a la ni lo. A damdawi awmchhun chu Anti Snake Venom chiah a ni. Hetiang case ah chuan a rang thei ang bera damdawia enkawl a tul avangin muangchang lovin Damdawiin pan ngei ngei tur. Second khat, Minute khat pawh a hlu. Tualchher damdawi avanga damdawiin pan mai loh te a pawi thin.
Thubelh : Rul tur (venom) hi mihring tan huat loh a awm thei lo. Amaherawchu allergy nei nasa leh nasa lo deuh chu awm theih a ni. Non Venomous emaw, Mildly venomous in emaw a lo chuk tawh avanga Rul Chuk haw lo emaw inti an awm fo mai. Tin Deadly Venomous pawhin an chuk hian tur pe chhuak lova chuk (dry bites) an nei fo va, chuvang chuan Rul Chuk haw lo emaw an inti thin.
Mithiamte - Herpetologist, Environmental Scientist, Medical Doctor etc sawi ka hriat atanga post siam ka ni a, keimah ang bawka hriatna nei thuk lem lo tan tangkaina a neih tak mialin... A duh tan copy paste phal sa....
Post a Comment