Mizoram Agriculture Marketing Solution (MAMSol) hotute chuan, Mizorama sawhthing thar zawng zawngte leisak vek turin an inbuatsaih tih an sawi a; an hmalakna avangin Mizoramah tun dinhmunah sawhthing hralhna rate a ṭha hle niin an sawi bawk.

MAMSol hotute hian nimin khan Aizawlah press conference neiin, Mizorama kut hnathawktute thar chhuah lei an tum dante an puang a; MAMSol chairman T Lalmuanpuii chuan, Mizorama sawhthing thar zawng zawng lei turin April 21, 2018-ah Siliguri-a Patel Ginger company nen agreement an nei mek tih sawiin, tunah hian Mizorama an collection centre 24-ah engtik lai pawhin sawhthing an lei thei tih a sawi. 

T Lalmuanpuii chuan, Siliguri-a mite nen agreement an neih hnuah Mizorama sawhthing tharte chu kg. khat Rs. 12 aia tlawm loin leisak an tum tih a sawi a, "Ch. Saprawnga Truck Terminal aṭanga Siliguri-a direct-a phurh turin agreement kan ziak a. Mizorama sawhthing awm zawng zawng hi quintal 2,00,000 - 3,00,000 inkar vel niin kan hria a, a vaia lei vek turin kan inruahman. Sawhthing hralhna hre lo zawng zawngte hi kan leisak vek dawn a ni," a ti.

Sawhthing Hralna - Mizoram Agriculture Marketing Solution (MAMSol)
Bagha sumdawngte'n an tihbuai theih lohin kut hnathawktute sawhthing hralhna siamsak an tum tih sawiin, Lalmuanpuii chuan, "Rs. 12-a lei kan tum thu kan puan tûk lawkah Bagha lam vaite'n Rs. 14 tiin min rawn lân nghal a, keini pawhin kan lân chho a, anni'n min rawn lân leh a, kan inlân chho zel a ni," a ti a; sawhthing man hniam ber tur (minimum price) an tuk hnuah sawhthing man a sang chho zel a, an game-ah Bagha vai ho an lut ta niin a sawi.

MAMSol Chairman sawi danin, May 1, Thawhlehni tlaia collection centre ṭhenkhata sawhthing leitu mi hrang hrangin sawhthing kg. khat an leina rate chu - Kolasib-ah Rs. 25, Serchhipah Rs. 31, Rabungah Rs. 28, Ruantlangah Rs. 25, Ratu-ah Rs. 25, Khanpuiah Rs. 23-25, Khawhaiah Rs. 24, Leisenzo-ah Rs. 30, Phullenah Rs. 20, Darlungah Rs. 17, Saitualah Rs. 30, Keifangah Rs. 36, Khawzawlah Rs. 20-26, Sesawngah Rs. 25, Chawngtlaiah Rs. 31, Hnahlanah Rs. 27, Vanlaiphaiah Rs. 27, Mualchengah Rs. 26, Tlabungah Rs. 26, Sailulakah Rs. 23-te a ni.

Sawhthing leina rate chu a leitu mi hrang hrang an nih avangin a inang lo tih sawiin T Lalmuanpuii chuan, "Rs. 12 aia tlem lo kan tih vanga sang ta a ni a, a san zel pawh kan beisei. Keini pawhin a remchan dan angin kan lân ve zel ang. Tunah chuan kut hnathawktute an phûr a, hei hi min tihlimtu a ni," a ti a; sawhthing man chu an ba ngai lo a, pawisa fai ni lo, chegue-in a man an pe nghal zel tih a sawi.

Zawhna chhangin MAMSol hotute zinga mi Zirrokunga chuan, sawhthing chu MLA inthlan kum ni loah pawh lei zel an tum thu a sawi a, "Kan tum anga kan lei theih chuan kan lei tam tulh tulh ang," a ti. Zawhna dang chhangin, sorkar aṭangin price support an dawn rih loh thu a sawi a, "Kan mamawh a nih chuan a pung awm loa min hmantir turin sorkar a inhawng hle. Kan la mamawh lo ang tih kan sawi thei lo a, tunah chuan kan la kal thei a ni," a ti.

MAMSol hotute sawi danin, sawhthing man chu a sawi tak tak thei loh loh a, chu vang chuan MAMSol pawhin minumum rate Rs. 12 an ti a ni. China leh Burma rama sawhthing an thar danin sawhthing manah awmzia a nei hle niin an sawi.

MAMSol hi Mizorama kut hnathawktute thar chhuah lei turin kum 2016-ah din a ni a, kum 2017-ah sawhthing an lei ṭan. Kum 2017 tir lamah sawhthing rate a ṭha lo hle chungin kg. khat Rs. 10-in Bairabi-ah an lei a, Bairabi phur thlengte chu an leisak zel a ni. Mahse, rate a tlakhniam zel avangin an lei rei lo.

Marketing mumal taka kal thejih kan duh, loneituten an thawh hah man hmu se kan duh. Thawh hah man an hmuh chuan tha zawka thawh theih nan loan te pawh an la ngam ang. Rate siamtu nih kan tum a, hlep neih tam ka um lo. Hnam dangin an duh ang zat zat rate an siam thin hi tha kan ti lo.

Kum 2017 tawp lamah sawhthing lei leh hralh chungchangah Bangladesh-a mite nen inremna an ziah hnuah December 2017 khan kg. khat Rs. 15-in an lei a, mahse, rate-in hniam lam a pan avang bawkin an lei rei thei lo. Kumin kum tirah Chennai lama mite nen kg. khat Rs. 12 aia tláwm loa lei turin an inrem leh a, Chennai lam mite chu Bairabi-ah inkulhin sawhthing an lei a; mahse, boundary buai vanga a leitu hnam dangte an haw avangin lei chhunzawm thei loin an awm leh a. Chumi hnuah, kumin April 21 khan Siliguri lama mite nen inremna an siam leh ta a ni.-VANGLAINI

Post a Comment

Powered by Blogger.