![mizoram chhiatna thlen ruah sur vanga chhiatna](https://blogger.googleusercontent.com/img/b/R29vZ2xl/AVvXsEiyBi2JRTUSfZiho-bMZ8T5P6csKO_Z2La72iawaQ_Tamux4tXaQxWZ6nTXrs0YQeBsgResmX_uwhwnj0nzmQPHvaJw-39OQ9Ky0NlIaLvBDMYDVZ04SNAJK0GYP5FhK787_mo21TMPCPFt/s320/img-20180612-wa_1528811483.jpg)
Lungleiah hian nimin zing khan Kikawn Lungchhengaw bula Chawngfianga Memorial School (CMS) compound chhak kawngpui chu a min a, helaia footpath hi a tihchhiat nasat bakah kawngpui pawh a min hek nasa hle a, a min lai chu silpaulin a khuh niin YMA an hnathlang a. Leimin in kawngpui a tih chhiat avangin helai hmunah hian barricade dah a ni . Zohnuai vengah lei tlahniam leh lei khi avangin chhungkaw pathum an chenna in atangin an in thiar chhuak tawh a. Zobawk S ah leimin avangin chhugkaw pakhat an in thiar chhuak tawh bawk. Electric Veng, SAI Extension bulah nizan dar 9 vel khan leimin in transformer a delh chhia a, electric ban pathum a tlu bawk a, veng engemawzat ah power supply a awm mumal theilo a, P&E Department ten siamthat hna an thawk mek a ni.
World Bank Road kawnga Ramlaitui khaw chhungah leimin nasa tak thlengin tun dinhmunah motor te tlan tlang thei turin PWD-ten an thianfai tawh a. Haulawng leh Tlawng inkar ah pawh leimin avangin kawng a min phui vek a, thenfai hna thawh mek a ni. Tarabonia-ah in 19 evacuate tawh niin Marpara South ah pawh chhungkaw engemawzat an in thiar chhuak tawh a, VCP atangin report kimchang ngaihchan mek a ni. Bunghmun ah kilometer khat a thui lei khi a awm avangin chhungkaw 12 an in thiar chhuak tawh a. Leimin avangin Zawlpui khua ah chhungkaw 30 leh Phairuang khua ah chhungkaw 3 an in thiar chhuak tawh bawk.
![ruah sur vanga chhiatna lunglei chanchinthar](https://blogger.googleusercontent.com/img/b/R29vZ2xl/AVvXsEj5NAIcIOOthRCAM4VZLWAB0Ib189I_Z54D7ZFo_KgnTMOqbYhcEpS7ubYnjUv9OTbzRGcxxmxH9xpIRJa3d5IlLIywM2jiClAbP8QQ6XtRkoIIHehyphenhyphenFgghDVn7qH1aT_M7MeGu_KtlQUe8/s320/img-20180612-wa_1528811507.jpg)
Indian Meteorological Department in Warning a pek danin ruah hi naktuk lamah pawh la tla chhunzawm tur a nih hmel a. Hei vang hian Lunglei DC Dr Ankita Chakravarty chuan mipuite chu chhuak vak rihlo tur leh an in leh a chhehvel uluk taka lo vil turin a chah a. A tul hun apiangah Disaster Operation Centre No. 0372-2323635, 9436157750 (SDC i/c DMR) leh 9862653478 (DO, DMR) ah te engtik lai pawhin an phone theih a ni. District Disaster Management Authority chu a tulna a pianga che chhuak tura an inralrin reng thu a puang a ni. Thli leh ruah avanga Lunglei hmun hrang hranga leimin, mimal leh vantlang thil tihchhiat te hi Lunglei Bawrhsap chuan a hnuaia officer te tir chhuakin a enfiah tir tawh a ni.
-DIPR
Post a Comment