fbb Colors Femina Miss India 2018 intihsiakna neih mekah June 15, Zirtawpni zan khan sub-contest winner puan a ni a, Miss India Mizoram Lily Lalremkimi Darnei chuan Fashion Icon title a la. Lily Darnei hian Miss Iron Maiden title a la bawk a, Mizoram tihming ṭhatu a ni.
Sub-title hlanna hi Renaissance Mumbai Convention Centre Hotel-ah neih a ni a, sub-title 21 sem chuah a ni. Fashion Icon thlanna hi a hautak hle a, show vawi khat inlan aṭang ngawta thlan a ni hauh lo. Contestant-te hi Miss India camp-a an awm chhunga an kawr hak hrang hrang aṭangin teh an ni a, May 16 - June 14 chhunga show ṭum 11 zet an neih aṭnga thlan chhuah a ni.
Contestant te hian designer ṭha ber ber te kut chhuak an inbel a, Fashion Icon sub-title la tur hian an thawk rim hle a ni. Fashion Icon hi sub-title zingah pawh ngaihlut ber a ni a, Miss India Mizoram-in he tiang title hlu tak a la thei hi a chhuanawm tak zet a ni.
Lily Darnei hian Mizo designer - Manuntei Sailo, Hannah Khiangte, Rempuii Hmar, Christine V, Sangboihi leh Vakiria te kutchhuak a inbel a ni. Anni bakah hian Maria Fanai, Zwaan, Karan Malhotra, Mahek Punjabi te kawr a ha bawk.
Mizoram aiawhtu Lily hian endiktute mit a tlung ber a, Fashion Icon title hi hlan a ni ta a ni. Fashion Icon nihna hi Miss World 2016 Stephane de Valle chuan a hlan a ni.
Lily Lalremkimi chuan "Fashion Icon ka lak theihna chhan hi ka designer te vang liau liau a ni a, an chungah ka lawm takzet a ni. Min ṭantu leh ṭawiawmtu ka ngah hle a, an chungah ka lawm hle a ni" a ti.
Miss Iron Maiden chu
Miss Iron Maiden thlanna hi May 19 khan Bennett University-ah neih a ni a, Miss India Contestant zinga fit ber thlanna a ni. Hemi atan hian physical fitness a pawimawh hle a, sport chi hrang hrang tihpui an ni. Hetah hian Lily hi pakhatna a ni a, Iron Maiden nihna hi Rohit Khandewal, Mr. World 2016 chuan a hlan a ni.
Haflong nula Lily Darnei chuan, "Mizo mipuite min thlawpna avangin ka lawm a, a tawp thlenga min ṭawiawm a, min lo ṭawngṭaipui zel turin ka ngen tak meuh meuh che u" tiin a sawi.
State 30 aiawhte intihsiakna
Femina Miss India thlanna hi June 19, Thawhlehni hian a hmawr bawk a ni dawn a, Mumbai-a NSCI Dome-ah Grand Finale hi neih a ni ang.
fbb Colors Femina Miss India 2018 Sub-title Winner
Miss Fashion Icon - Lily Lalremkimi Darnei (Mizoram)
Miss Vivacious - Mamita Debbarma (Tripura)
Miss Goodness Ambassador - Shreya Rao Kamavarapu (Andhra Pradesh)
Miss Glamourous Look - Gayatri Bhardwaj (Delhi)
Miss Popular - Gayatri Bhardwaj (Delhi)
Miss Rampwalk - Meena Ahir (Madhya Pradesh)
Miss Body Beautiful - Anna Kler (Punjub)
Miss Refreshing Beauty - Mary Khriem (Meghalaya)
Miss Shining Star - Prarthana Sarkar (West Bengal)
Miss Photogenic - Meenakshi Chaudhary (Haryana)
Miss Tech Beauty - Aashana Gurav (Goa)
Miss Glowing Skin - Prarthana Sarkar (West Bengal)
Miss Getaway Goddess - Spandana Palli (Chhattisgarh)
Miss Spectacular Eyes - Gayatri Bhardwaj (Delhi)
Miss Lifestyle - Mehak Punjabi (Maharashtra)
Miss Active - Himanshi (Uttar Pradesh)
Miss Beautiful Smile - Anukreethy Vas (Tamil Nadu)
Miss Iron Maiden - Lily Lalremkimi Darnei (Mizoram)
Miss Congeniality - Osin Mosu (Arunachal Pradesh)
fbb Colors Femina Miss India 2018 sub-contest ceremony-ah hian Miss World 2017 Manushi Chhillar leh Miss World Chairperson Julia Morley te hnenah special award hlan a ni a, Miss World 2016 Stephanie Del Valle pawh a inlan bawk a ni. ~ Source:Vanglaini
Post a Comment