Kum 19 mi lek ni mah se a naupanna chuan a tum a ṭulh tir chuang lo a, tunah chuan Femina Miss India atan thlan a ni ta. Tamil Nadu nula Anukreethy Vas hi amah mai chuan nula awm nem ve tak a ni a, hlawhtlinna a chan theih nan hian a chhungte chuan nasa takin an pui a ni.
A tirah chuan
Anukreethy Vas hi kum 1999 khan Chennai-ah a piang a, an chhungkua hi Hindu sakhaw zuitu an ni. Kristian tiha mawi thil tam tak a lo ti tawh ṭhin a, midangte tan malsawmna a lo ni fo tawh ṭhin. Kum 2015 ṭang khan NGO te nen ṭangkawpin mahni nihna thlak (transgender) te chungchangah zirtirna pein beihpui an lo thlak tawh a, an hna thawh hian hriat pawh a hlawh hle.
Anukreethy Vas chuan, "School-a ka ṭhiante zingah transgender pakhat a awm a, a chhungten an thlahthlam hle. Harsatna tam tak a tawk a, amah pawn hreawm a ti thei hle a ni. Harsatna tawh ang hi midangin an tawh ve lohna turin theihtawp chhuahin ka bei ta a, NGO te thawhpuiin bul kan ṭan ta a ni" tiin a sawi. Anukreethy chuan sawizawmin, "Tunah chuan mi tam takin zirtirna an dawng tawh a, a bikin naupang ten an ṭangkaipui hle a ni. Transgender naupang 30 zet chu tunah hian adopt turin kan inbuatsih mek a ni," a tibawk.
Kawng dik zawhin
Anukreethy chuan a nu Seleena chu kawng engkima kaihruaitu a nih thu sawiin, "Ka tana a hlutna hi suma lei theih rual a ni lo," a ti. Kawng engkima kaihruai ṭhintu a nih thu leh tun dinhmun a thlen theihna chhan a nih thu a sawi.
Anukreethy chuan, "Tamil Nadu-a khaw lian lo tak Trichy-ah zirna bul ka ṭan a, hmabak a ko hle. Mahse ka chawrchhuahna hian min tihnual lo a, tumruhna min pe zawk a ni. Ka nu hnen ṭangin huaisenna leh inrintawkna nei tura fuihna ka dawng ṭhin a, chu chu ka chakna hnar a ni," tiin a sawi.
Anukreethy hian tunah hian Loyola College, Chennai-ah Bachelor of Arts (French) a zir mek a, zirna run abelh mek lai hian fbb Colors Femina Miss 2018 atan thlan a a ni ta a ni. Anukreethy hian Miss World 2018-ah India ai a awh dawn a, India hming ṭhatna tur tam tak chu a kutah a awm ta a ni. Midangte ngihsan leh en bik a ni tawh a, a hawina lam apiangah India mipuiten an thlir zui tawh dawn a ni. -Vanglaini
Post a Comment