Mizoram Assembly Passed The Sinlung Hills Council Bill 2018

Vawiin ni 27 June 2018 a tan Mizoram Legislative Assembly 7-na, thutkhawm tum 16-naah ‘The Sinlung Hills Council Bill, 2018’ lungrual taka pass a ni.

Vawiin Assembly Session-ah hian session hnuhnung ber leh tun session inkara thi, House member leh Dy. Minister lo ni tawh Pu PB Nikhuma sunna hun hman a ni a, house dawhkanah lehkha pawimawh pakhat pharh a ni a. Hemi hnu hian Home Minister Pu R. Lalzirliana putluh, ‘The Sinlung Hills Council Bill, 2018’ sawihoa pass a ni.

Bill puluttu Home Minister Pu R. Lalzirliana chuan hun rei tak Mizoram sorkar nena lo inhmuthiam lo tawh HPC(D) leh Mizoram sorkarin kumin April ni 2-a inremna thuthlung an lo ziah tawh tihhlawhhlin nan Bill hi putluh a ni, a ti a. Bill-in a tum ber chu inremna thuthlung siamtu pahnihte’n an pawm dun inremna ruhrel huang chhunga Sinlung Hills Development Council awm mek hnena mahni bill thuneihna zau zawk pek a ni, a ti.

Sinlung Hills Council hi inremna thuthlunga tarlan angin Mizoram Legislative Assembly-in dan a siam hmanga din tur a ni a. He Bill hmanga Dan bung leh chang zam tur hrang hrang te hi Mizoram sorkar leh HPC(D) te an inbiak laia inremna atana a ruhrel leh a ruangam an lo pawm dun tawh te an ni tih Home Minister chuan sawiin, Mizoram sorkarin Sinlung Hills Council Area atana Village Council area hrang hrang a bithliah tur huam chhungah Sinlung Hills Council din a ni ang a, Council chuan General Council leh Executive Council a nei ang a, Gen. Council-ah hian member 14 awmin chung zinga member 12-te chu mipui thlan an ni ang a, member 2-te erawh chu Council râwn chunga sorkar ruat tur an ni ang. Heng member 12 thlan chhuah atang hian Chairman, Dy. Chairman leh Chief Executive Member (CEM) te thlan leh an ni ang. CEM-in member dangte atangin Executive member 4 a ruat ang, a ti.

General Council hian an inrelbawlna atan kum tin Budget an siam ang a, sorkar pawmpui turin an thawn thin ang. Sakhuana thil leh khawtlang nunphung Hmar hnam dan leh hrai bik khawih thei thil Dan siam a nih dawnin state sorkarin General Council a râwn thin ang a. General Council hi din a nih hma chuan sorkarin a theih anga hmain Interim Executive Council din turin Executive member lailawk turte a ruat ang a, CEM tur hi HPC(D) te’n rawt an nei tawh a, a hming pawh duh chuan puan mai theih a nih thu Home Minister chuan a sawi.-AIR News Aizawl