MIZORAM EDUCATION CHANCHINVawiin khan Finance Minister Pu Lalsawta chuan Pu VL Nghaka lehkhabu ziak “Mizoram Education Chanchin” chu Ramhlun Indoor Stadium-ah a tlangzarh.

Pu Lalsawta chuan Education hi Mizoram laimu a ni a, zirna a fuh loh chuan thildang engmah fuh thei a awm lo, a ti. Education hi sum peipunna (investment) hlawk ber a ni a, dinhmun tha leh ropuia chuangkai duh  chuan lehkha a thiam a ngai a, tun dinhmun kan thlen theihna chhan hi education vang a ni, a ti a. Chutiang taka pawimawh zirna in hma a sawn theih nan education-ah hian  politics inrawlh lo se, sawrkarin education atana sum a pek bak hi chu thil dangah inrawlh lo se tha bera a hriat thu Minister hian a sawi a ni.


Zir tam si, thiam tlem kan tam lutuk pawi a tih thu sawiin Pu Lalsawta chuan thiamlo te thiam ve theihna tura zirlai syllabus siam tul a tih thu sawiin sawrkar laipui Union Human Resource Development (HRD) Ministry in NCERT syllabus a chanve hmawka tihtlem a tum chu a thlawp thu a sawi a.  Mizoram zirna chungchang hrechiang em em tu Pu VL Nghaka’n lehkhabu a tichhuak chu lawmawm tiin chhiar tham, hnam ro tling, ram hmasawnna atana ngaihtuahna hmang thin te leh sawrkar lai tana tangkai tak tur lehkhabu a nih thu he hunah hian Minister Pu Lalsawta chuan a sawi a ni.


“Mizoram Education Chanchin” tlangzarhna hun hi Prof. R.L. Thanmawia’n a kaihruai a. Education Minister lo ni tawh thin Pu H. Thansanga chuan lehkhabu thlir lawkna hun a hmang a. Mizoram education hmasawnna tura thawktu, mi hmingtha leh langsar tak tak he lehkhabu release-na ah hian an tel a ni. -DIPR

Post a comment

Powered by Blogger.