Mizoram State Scholarship 2018: Mizoram University Student Council (MZUSC) hruaitute chuan nimin khan Aizawl Press Club-ah thuthar thehdarhtute an kâwm a; post matric tribal scholarship (PMTS)-a sorkar hmalak mekna an duhkhawp loh thu an sawi.
MZUSC vice president Zodinsanga chuan, PMTS lak har a nih avangin post graduate zirlaite'n harsatna an tâwk nia sawiin, "Hei hian PG zirlaite hma hun a chhe zawnga a nghawng theih avangin MZUSU chuan sorkar hmalak mekna hi duhkhawp harsa kan ti tawh tak zet a ni," a ti.
Zodinsanga sawi danin, mess fee leh admission fee pek turah scholarship-a innghat zirlai tam tak an awm a, an pek theih loh chuan exam mah se, an result a chhuak thei dawn lo. MZU hnuaia zirlaite chu tun academic session tawpna atan an exam ṭan mek a, exam hnuhnung ber turte chu July 16, 2018-ah an zo ang.
Scholarship chungchang ngaihtuah a nih apiangin MZU zirlai aiawhte telh an nih ve ngai loh thu sawiin Zodinsanga chuan, "Hei hi hriatthiam harsa kan ti a, inngaihthahna lian takah kan ngai. Min telh ve tur pawhin kan ngen tawh ṭhin," a ti a; tun hnuah chuan scholarship ngaihtuahnaah MZU zirlaite telh ve tawh an phût thu a sawi.
MZUSU hruaitute chuan, academic session 2017-18 ral hma ngeia post-graduate zirlai zawng zawngte'n scholarship an dawn an phût thu sawiin, "Tun academic session zawh hma ngeia post matric tribal scholarship hi kan la lo a nih chuan na zawk leh a ṭul dan ang zela hmalak kan tum," a ti.
Sorkar laka an lungawi lohna chhan hrang hrang zawhna chu MZUSU hruaitute chuan an chhang lo thung. -Vanglaini
Post a Comment