Mizoram Sorkarin SIPMIU kaltlangin Aizawl khawpui bawlhhlawh paihfai nan Motor 50, Tata 407 LPK tipper a leite chu man to uchuak taka lei nia sawiin MNF Thalai chuan a changtu Minister Pu Zodintluanga sawifiah turin an phut, tih an sawi.
MNYF Gen.Hqrs, hruaitute chuan vawiin khan Aizawl Press Club-ah Press mite kawmin SIPMIU Motor lei danah thil fello awm ngeia an hriat thu an sawi a. SIPMIU hian Tata LPK 407 sawmnga lai an lei a. Tata 407 LPK hring 25 leina man hi July ni 5, 2017 ah cheng vbc 4, nuai 45, sing 6, sang 8 leh 710 leh August ni 17, 2017-ah cheng nuai 85, sang 6 leh 290 te pek a ni a. A vaia a hring an leina man hi cheng vbc 5, nuai 30, sing 7 leh sang 5 a ni. A pawl leina man hi cheng vbc 4, nuai 96, sing 9 sang 7 leh 250 pek a ni a. 407 LPK a hring pakhat hi cheng nuai 21, sing 2 sang 3 a lei a ni a. A pawl pakhat hi cheng nuai 19, sing 8 sang 7 leh 890 a lei a ni a, a inthlauhna hi motor pakhatah cheng nuai 1, sing 3, sang 5 leh 110 ni a, a rawng avanga hetiang em ema Motor man inthlau hi a mak viau tawh laia to uchuak taka an lei thei hi Minister thu lo chuan Official tan tihngam chi niin a lang lo an ti. A rawng avanga Motor man inthlauhna hi Motor 25 ah chuan Nuai 33, sing 7, sang 7 leh 750 lai a ni, an ti.
SIPMIU-in an lei lai hian heng Motor Tata 407 LPK te hi Nuai 9 leh sing 8 man vel a ni tih sawiin. SIPMIU hian Tipper body pangngai lei tel lovin a aiah Plain Sheet pangngai hmangin a body an zawm sang thung a. An hmanraw hman en hian Motor man to phahna tur a awm lo a, a lo to phah a nih pawhin cheng nuai 3 aia to phah thei a ni lo, an ti. LPK 407 sawmnga an leiah ringawt cheng vaibelchhe 5 aia tlem lo mipui sum khawiahnge a awm tih Minister an zawt tih an sawi a ni.
Press Conference hi MNYF Gen.Hqrs. Vice President Pu H.Ramdinlianan a kaihruai a ni.
-AIR News Aizawl
Post a Comment