North Eastern Region Finance Services (NEREFS) Ltd. buainaNorth Eastern Region Finance Services (NEREFS) Ltd. hnuaia thawk thin tun hnaia an ban tak mi 40 rualte chuan chhan nei loa ban an nih avang leh thla tam an hlawh a chanve chauha pek nih avangin Executive Director NEREFS Ltd. Lalremsiem chu court-ah khin an tum.

Thudawn danin NEREFS Ltd hnuaia thawk mi 40 vel chu kumin march thla khan chhan awm lo in ban an ni a, heng mite hian chhan awm lo a ban an nih avang leh thla 12 chhung an hlawh a chanve chauha pek an nih avangin NEREFS neitu Lalremsiem chu court ah khin an tum a. NEREFS-a thawk thin pakhat chuan an hotute court-a an khinna tur hian ukil pawh an biak fel tawh thu leh june thla chhung chuan court-ah kal ngei an tum thu kan palai a hrilh.


NEREFS Ltd-a thawk thin Thangi chuan hlawh an lak mumal lohna a rei tawh thu sawiin, thla rei tak chhung hlawh pek an nih loh avang hian august,2017 ah pawh thawktuten lungawilohna an lo lantir tawh thu a sawi a. Hun rei tak hlawh la lova lungawilohnate an lantur hnu ah kumin february thla khan an hlawh chu pek an nih thu sawiin," Kan hlawh full kan la dawn emaw tih laiin hlawh chanve aia tlem zawk mah pek kan ni," a ti.

Kum 2016 atangin Lalemsiem-i Bank an tih mai NEREFS chu a mumal tawh loh thu Thangi chuan sawiin, chumi avang chuan thawktu tam zawk chuan an hna ban sana hmun danga thawhte an tum thu a sawi rualin hna dilna atana pawimawh an original certificate erawh an hren saka an pe chhuak duh lo niin a sawi a. An certificate dil chhuah an tum apiangin chhuanlam hrang hrang siamin lak an phal lo thin niin a sawi a, hna dang hmu mai tura ngaihte pawh an tal buai hle niin a sawi .

Thangi chuan an original certificate te hren sak tlat an nih avang hian thawktu tam zawk chuan hna dang an dil thei lo nia sawiin,amah ngei pawhin hna dang a dilna turah a buai thu leh tunah chuan sorkar hna dil turin a kum a over tawh thu a sawi a, dik lo taka an original certificate hren beh anih avangin sorkar hna an phak tawk ang pawh an hmu ve thei tawh dawn lo niin a sawi.



NEREFS a thawk thinte chuan NEREFS-a thawk leh an hnena loan latu te document hmangin an remtihna tel miah lovin Bank hrang hrangah loan lak a nih thu kan palai hrilhin, NEREFS in loan an rulh that loh avang hian Bank atangin phone leh lehkha hmanga loan ba thinna an dawn nasat thu an sawi a. NERFS-a thawktute chuan NEREFS hotuten mi phalna la lova loan an lak avanga Bank in an thinna document thahnem tham tak an thup bo te chu engtin nge an tih dawn an hriat loh thu leh chungte chu sem chhuaha mipui hmuh theiha pho chhuah mai an duh thute an sawi a ni.



Thawktute hlawh hun rei tak chhung pek an ni lo chung hian an pi Lalremsiem chuan sum tam tak sengin thil chi hrang hrang a huaihawt thei reng tho niin NEREFS-a thawktu an ban takte chuan an sawi a, Wales rama rawngbawlna leh Biak In sakna leh thil dang tam tak a ti thei chunga a hnuaia thawkte hlawh a ba reng bawk si leh a bat thenkhat a pek hnu pawha a full-a a la pe duh lo cheu te chu mak an tih thu an sawi bawk a ni. 

Aizawl May 31, 2018 Lunglen Bureau

Post a comment

Powered by Blogger.