Pathianni liam ta atanga vawiin thlenga ruahsurin chhiatna a thlen chu vawiina Chief Minister Pu Lal Thanhawla hova Council of Minister thukhawm chuan pawi an tih thu leh chhiat tawkte an tuarpui thu an sawi.

Ruahsur hian Aizawl khawpui leh Mizoram hmun hrang hrangah harsatna thlenin - in chhia, kawngpui min, leiminin kawngpui a hnawhte leh tuilianin chenna hmunhma a chim mek te a awm nual a ni.

Aizawl khawpui chhung bikah chuan tukin khan Nursery Vengah mimal chenna in pakhat a chim a, khawtlang mi tlawmngaite leh SDRF member-ten in chim ruhrel leh senghawi ngaite an senghawi nghal a. Hunthar Venga lei tlahniam thin laiah pawh lei tawlhin National Highway 54 a hnawh ping a, thenfai hna thawh nghal ni mah se he thu buatsaih lai thleng hi chuan kawngpui hi a la tlang thei lo a. Chanmari West leh Vaivakawn inkar kawngchhak lam atanga lung tla chuan private car pakhat a delh chhia a; helai kawngpui dunga chengte hi fimkhur thu-hlaah an riak chhuak a; Chhinga Venga retaining wall chimin kawng a hnawh chu thenfai hna thawh nghal a ni a. Chanmari Ramhlun Road-ah lung lian tak tak Laipuitlang pang atanga tla a awm bawk a; he thu buatsaih lai thleng hian kawngpui a la ping a ni. 



Dinthar Vengchhungah EBCC Biak In sak thiahna thlang kopang chu min thei dinhmunah a ding a; New Secretariat Complex Taxation Commissioner kawmthlang chu a thlang kawngpui, New Secretariat atanga Dinthar panna kawngpui hnawhping theiin min hlauhthawnawmin a awm bawk. Heng bakah hian Aizawl hmun tam takah leimin in foothpath a tihchhiat te, thingzar tliakin electrict hrui a vuak chhiat te leh mimal in hmun a tihmin te a awm ni a hriat a ni.

Thli leh ruah avanga Aizawl hmun hrang hranga leimin, mimal leh vantlang thil tihchhiat te hi Aizawl DC chuan a hnuaia officer-te tirchhuakin a enfiahtir tawh a; sawrkarin a tul angin hna a thawk chho mek zel a ni.

Tuirini lei a chhiat avanga a helna tur PWD-in an siam, Chalfilh Grp YMA-in hnatlanga an siampui pawh tuilianin a chimpil vek avangin hmar tlang dung lam a tlawhpawh theih rih loh a. 

Khualzin tangkhang mi 13-te chu Khawruhlian Jt. YMA hruaitute’n an mikhual mek a ni.
DM&R a\anga thu dawn danin Tlabung khuaa in 100 vel chu tuiin a chim mek a, Langkaih lui lian avangin Bawrai khua pawh an insingsa mek a, Tlawng lui lianin Sairang khuaa in 14 a chim mek bawk a, hengte avang hian chhungkaw engemaw zat hmun him lamah an inthiar chhuak mek a ni.

Lunglei khawpui chhung bikah chuan Electric veng LDSC ground No II bulah P&E deptt ten tranformer an dah chu a innghahna leiminin tranformer hi a minpui a, a bul lawka awm RCC bldg pakhat, chhungkaw 5-in an luah pawh a him tawh loh avangin vawiin khan Electric veng YMA ten hnatlangin an bungrua an thiar chhuahsak a. YMA te hian transformer hi hruizenin an hnukchhuak nghal bawk. Bazar veng leh Serkawn inkar private school pakhat bul lawkah pawh kawng thlang lam a bal a. Motor lian tan kal hlauhawm a nih avangin PWD chuan nizan khan motor kal rih lo turin ngenna an siam a, a min zel loh nan a ven dan tur an buaipui nghal a ni.

Khawthlang tuipui lian vangin Tlabung-ah chuan mipui an buai hle a, Mizo chhungkua chenna In 100 dawn tuilian hian chîmin YMA-in \anpui hna thawkin YMA Run leh Trade & Commerce bldg.ah te an dah lailawk a. Tui lian hian Tlabung bazar leh Licheng field pawh a chim vek tawh a, hei vang hian Power supply pawh tih tawp rih a ni. 
Aizawl leh Lunglei inkar kawngpui chu Sialsuk bulah leh Ramlaituiah te leiminin a hnawh ping a, lirthei engemawzat an tang a, Hnahthial bulah pawh motor lian kal theih lovin kawng a min a ni. 

Kolasib Dist.-ah chuan Bairabi Chhim venga Pi Lalthandangi te chenna In, Assam type chu tukin dar 5 vel khan Tlawng lui lianin a chhuat chanve a la a, in hi luah zui tlak a ni lo a, tukin khan YMA leh mi tlawmngaiten an bungrua an thiar chhuahsak a ni.

Serchhip-ah chuan tukin khan Serchhip-II Sailiam venga hmeithai Pi Darengi in leimin a hnawl a, tukin vek khan New Serchhip North Vengthara Pu Thanngura in Assam type sak thar pawh leimin hian hnawlin, in hi luahtu la awm lo a nih avangin mihring tawrhna a thleng lo bawk a. Nimin khan New Serchhipa Salvation Biak In thlang lungrem pawh chimin a thlanga Auto Rickshaw a delh chhia a, Serchhip Chanmari vengah lei tlain Pi Lalfingi 207 motor kawngsira dah a delh bawk. Heng thil thlengah hian mihring tawrhna thleng a awm lova hriat a ni.

Tuikhuah venga tun hmaa NH-54 tlahniam thin chu nasa taka khiin a tlahniam leh mek a, a chhak lama helin lirthei an la kal thei tawk tawk a, Hemi bul kawngko Saron veng mawng leimin avangin chhungkaw 3 an inthiar chhuak a, a hnuai lam Serchhip-III Tuikhuah vengah pawh lei a khi nasa a. Serchhip-III ah hian chhungkaw 2 lei khi min mai thei avangin mahni in chhuahsanin an inthiar chhuak a.

Vawiin chhuna Serchhip-II Dinthar Farm Veng Pu Lalmuana kawtah leiminin NH-54 a hnawh a, PWD highway a thawk ten khawl hmangin lirthei kal theihin an thian fai nghal bawk. Heng chhiatna hmun hrang hrang te hi SDO (sadar) Pu Rengpuia leh DC office-a thawkte’n an fang a, silpaulin an pe nghal hlawm a ni.

Vawiina Chief Minister Pu Lal Thanhawla hova Council of Minister thukhawm chuan tunhnaia nasa taka ruahsurin Mizoram hmun hrang hranga chhiatna a thlen chu pawi an tih thu leh chhiat tawkte a tuarpui takzet thu an sawi a. District tin Deputy Commissioner-te chu anmahni bial theuha chhiatna thlengte uluk taka chhinchhiah a, finfiahna Video record nen kimchang taka Disaster Management & Rehabilitation Department-a thehlut turin an ti a. DC leh DM&R Department chu a theih ang anga tanpuina pe nghal tur leh mipui harsatna lo sutkianpui turin an hriattir nghal a ni.

(IPR & PTCs)

Post a comment

Powered by Blogger.