Mizoram PoliticsNi 20.06.2018 (Nilaini) hian Tuirini Leidawh chim chu Pu K. Vanlalauva, Member, National Core Committee &Co-Chairman Vigilance Committee MNF leh General Headquarters-a Vigilance department hruaitu engemaw zatten a hmunah kalin an tlawh a.

Pu K.Vanlalauva chuan he hmunah hian thusawiin, "Mizoram Congress Sorkar kan hrawn meka PWD enkawl chuh tlattute unau hian tihsual lian tak an nei a ni ang. Khawi State-ah mah la thleng ngai lo kum 4 chhungin Lei chim rapthlak tak vawi 6 ngawt mai kan tuar a, Nunna hlu tak pathum lai kan chan ta mai hi pawi kan ti tak zet zet a ni," a ti.

"Mizo National Front, Gen. Hqrs. Vigilance Department chuan Mizoram hmar lam tlangdung kawngpui pawimawh berte zinga mi zawh theih loha hun rei tak a awm hi pawi kan tiin a tuartu mipui kan lainat em em a ni tih leh, he harsatna hi Sorkar thil tih dik loh nia kan hriat avangin a mawhphurtu PWD Minister Pu Lalthanzara hi Minister ni tlakah kan ngai lo tih entir nan vawiin 20.06.2018 (Nilaini) hian Lei chimna hmun Sesawng leh Khawruhlian inkara Tuirini Lei chimna hmun hi kan tlawh a ni. Mizorama Congress sorkar hian Dt. 24.03.2017-ah khan West Bengal lam mi M/s Essen Fabricators Pvt. Ltd, Kharagpur chu helai Tuirini Lei, Feet 200-a sei siamna tur hmanraw man Rs. 1,80,55,000.00 bakah Excise duty Rs. 22,56,875.00, CST Rs. 29,45,221.00 leh Kharagpur atanga helai Tuirini hmuna bungraw rawn dahna senso (Transportation) ringawt atan Rs. 18,00,000.00 , a vaiin Rs. 2,50,57,096.88 ( Cheng Vaibelchhe hnih nuai sawmnga sing nga sangsarih sawmkua paruk) Supply Order a pe a. RTI Act hmanga Information kan dawn dan chuan, helai Lei siam chhung hian he Lei zawhtu mipuiin harsatna an tawh loh nan Kawng dang (Subway for diversion) siam ngei ngei tur a ni a, a siamna tur pawh Rs. 19,93,578.00 lai dah a ni nghe nghe a ni," Pu K.Vanlalauva chuan a ti a.


Pu Auva chuan, "Tuirini Lei siam zawh hun mipuiin nghakhlel taka kan nghah laiin Ni 13.02.2018 khan kan unau mi 2-te feh kalin an zawh laiin vanduaithlak takin a chim ta mai a, MNF chuan pawi kan ti em em a, rang takin kan MLA-te nen kan rawn tlan chho nghal a. A mawhphurtu chhui chhuak turin Sorkar kan phut a nih kha. Helai Lei chim hi siamchawp chhiatna thleng niah MNF chuan kan ngai lo thei lova, a chhan chu:-

- A hmuna kan endiknaah Lei dawh nan hian Hmanraw hlui hman awmin kan hria a, heng hmanraw hlui hi Supplier rawn Supply nge a nih hmun danga hman hlui Department lakkhawm? tih Minister hi kan zawt a. Hmanraw thar diai Feet 200 daih Supply tura Order pek a nih laia hmanraw hlui hman a ni hi Minister leh Supplier-te sam inphiarzawmna, Corruption lian tak a nih avangin hetianga mipui rawngbawlna tur MLA/Minister nihna hmanruaa hmanga mipui rawk nana hmangtu hi MLA/Minister ni tlakah kan ngai lo a ni.


- A mawhphurtute zawn hna an kalpui emaw kan tih laiin PWD Minister hian Dt. 22.03.2018-ah, ‘a chim chhan sawi theih a ni lo’ min tihkhum a, Dt. 23.05.2018-ah Enguiry Commission Report chu Sorkarah thehluh tawh ni mahse, tun thlengin engmah an la puangzar duh lo hi zepruk emaw thup ngai emaw a tam vang niin kan hria a, He enquiry report hi mipui hriatah puangzar vat turin kan phut a ni.

- PWD Minister Pu Lalthanzara hian Enquiry Commission Report pharh si lovin Dt. 01.06.2018 khan, ‘Tuirini Lei chimah Engineer-ten mawhphurhna an nei lo’ tiin Mizoram mipuite chu zah loh takin min tawngkhum leh ngat a. Enquiry report pharh si lova a mawhphurlotu a hre tlat hian ngaih a titha lo a, enquiry report hi ama duh anga a ziahtir a ni em? tih kan zawt a. Tuirini Lei dawh tura tul zawng zawng buaipuitu hi Engineer an ni a, a dawh hnathawktu pawh Engineer an ni a, an dawh dan dik leh dik loh endiktu pawh Engineer an ni. Engineer chunga thuneitu awmchhun chu Minister chauh hi a nih avangin Lei chim chhan hre ber tur pawh a ni reng a, Minister berin, ‘Engineer-ten mawhphurhna an nei lo’ tih a sawi hi ‘Buichhia laih lohin a inpuangah’ kan ngai a. Minister nihna zahawm tak a tihbawrhban avangin MLA leh Minister Office zahawm tak luah zel tlakah kan ngai lo a ni," a ti a.


"Kan hriat angin Vai sumdawngte thurualpui lama Specialist PWD Minister Pu Patea hian dik lo taka MLA/Parliamentary Secretary nihna hmanga Vai Contractor-te nen Contract hna tam tak an thawh avangte, Social Welfare-ah dik lo taka Supplier hna a lo thawh hmuhchhuah a nih tak avangte-in Dt. 20.08.2015 khan MLA atangin Assembly Dy. Speaker hming sign ngeia ban a lo ni tawh a. Hetiang case avanga MLA atanga bang Mizoin kan neih awmchhun a la ni rih awm e!!Pu Lalthanzara hian Hmar lam tlangdung hi a hmusit deuh emaw ni chu aw tih turin 29.09.2014 khan Assembly Assurance Committee-ah thudik lo a lo thehlut tawh a, Hmarlam tlangdunga khaw 7-ah Health Sub-Centre/ Clinic Centre awm lopui awm angin dawt chiang lutuk a thehluh avangin Dt. 28.03.2015-ah kan Police pathumin nunna hlu tak an lo chan phah tawh nghe nghe a ni. Ram rorelna kalphunga a chhe ber chu Chhungkaw bil lal bikna Party leh Sorkar (dynastic government) hi a ni a, India hi mihring tam ber 2-na ram ni si World Cup Football khel ve pha loa kan awm rengna chhan pawh hi hetiang Chhungkaw bil lalna Party Congress-in rei tak min awp vang a nih hria-in remchang nei hmasa apiangin an hnawl chho zel ta a ni. Mizoram hmangaihtute pawhin Mizoram atanga kan umbo vat hi ram hmasawnna atana bul tanna a nih avangin remchang kan neih hmasak ber tun kum tawp Inthlanah Congress umbo turin Mizoram puite kan sawm a ni," Pu Auva chuan a ti bawk.

Pu Auva chuan, "Tuirini Lei chim avanga he kawng hmangtu mipui tam tak harsatna tawk leh manganga awm mekte hi MNF chuan kan lainat em em a, Tuirini Lei dawh mek sum siam nana hmangtute avanga Lei siam chu zawh theih loh a nih pawhin mipuiten harsatna kan tawh loh nana kawng siamna tur pawisa awm reng si-a Sorkarin hma a la tha duh lo hi MNF chuan kan dem takzet a. A rang thei ang bera a mawhphurtu Pu Lalthanzara hian Minister office zahawm tak hi luah chhunzawm zel tawh lo tur leh mipui harsatna tawh mek hi rang taka sukiang ngei turin Sorkar kan phut a ni," a ti. 



Post a Comment

Powered by Blogger.