Vawiin chawhnu khan Champhai District Bawrhsap thar Dr. Naveen Aggarwal leh MJA Champhai District member-te chuan DC Conference Hall, Keifangtlangah inkawmhona leh inhmelhriatna hun an hmang a. MJA Member-te hi President Pu C.Lalhnunpui’an a hova,  Champhai District hmasawnna tura hmalakna hrang hrangte DC hi an sawipui a ni.

CHAMPHAI DC THAR DR. NAVEEN AGGARWAL


Dr. Naveen Aggarwal chuan MJA member-te chu sawrkar thiltih leh hmalaknate mipuite hriata pholangtu an nih inhriaa dik tak leh rinawm taka thawk thin turin a fuih a. Sawrkar hmalaknaah mipuite atanga ngaihdan awmte pawh hrilhhre  thin turin a chah a. Champhai Bawrhsap chuan MJA member ten District tana hmalakna tur a hnena an thlente chu lo enzui a tum thu a sawi a. Dan leh thupek kenkawh kawngahte, inbiakpawhna lama harsatna leh dan loa sumdawnna, ruihhlo leh dan loa thil tawlhruk thinte chu ngaihmawhawm a tiin hmalak a tul thu a sawi a. A bik takin Ruihhlo dona kawngah lungrual taka beihpui thlak a ngaih thu leh mitin huapzo zirtirna zau thei ang ber media hmanga neih a tul thu pawh a sawi a. Ruihhlo laka beihpui thlakna leh inzirtirna chu Biak In, Khawtlang leh Zirna Inah te uar zawka kalpui nise a duhawm tur thu a sawi a. Inbiakpawhna leh Internet lama harsatna awm thin sutkiang anih theihna tur Common Service Centre siam anih theihnana  bawhzui a tum thu a sawi a.  MJA member-te chu sawrkar hmalakna  leh scheme hrang hrangte zau zawka puanzar aniha mipui ten an hriat  zel theih nan   thawhpuiah a sawm a ni.




Champhai District MJA President Pu C.Lalhnunpuia leh hruaitu dangte pawhin thusawiin an thil ngaih pawimawh leh mamawhte DC hnenah an thlen a. Champhai DC lakah District mipuiten beiseina sang tak an neih thu leh a awm chhunga District tana thil hriatreng tlak hnutchhiah tum turin an ngen a. Champhai District hmasawnna turin theihtawp chhuaha ke pen chhunzawm zel an tum thu an sawi bawk a ni.

Champhai DC hi Pu Abraham Beirazi Khithie SDO (Sadar) leh Dr. Lallawmkima, DIPRO Champhai ten an tawiawm a ni. MJA Champhai District hi December 31,1988 a din niin tun dinhmunah member 15 an awm mek a ni.  ~DIPR

Post a comment

Powered by Blogger.