Hmangaihthanga: Vawiin 18th National Fish Farmer Day 2018 leh Silver Jubilee, College of Fisheries, Central Agriculture University (Imphal) Tripura lawmna inkhawm Tripura a buatsaihah Pu Hmangaihthanga, Serchhip Zozam veng chuan Northeast Best Fish Farmer Award a dawng.
He National Fish Farmer Day leh College of Fisheries Jubilee lawmna inkhawm a ruala neihah hian Northeast huam chhunga State hrang hrang pasarih atangin Sangha khawia eizawngtu hlawhtling mi pasarih thlan chhuah niin State tin atangin mi pakhat theuh thlan chhuah an ni. Pu Hmangaihthanga hian tunah hian Sangha Dil pariat, 3.5 Hactares, a zau neiin a ramah Community Fish Pond tur a pe bawk a. Kuminah hian Sangha 20 qtls lai a tharchhuak a ni. Pu Hmangaihthanga hian Sangha dil tui paihna (drainage system) pawh bawlhhlawhin an hnawh pin theih loh turin a duangchhuak a, Fisheries Department chuan hetianga tui paihna hi MT Technology Drainage System tiin a hming an phauh sak nghe nghe a. Tin, BPL chhungkua ten intawma sangha dil an neih ve theih nan a ram zau tawk tak a donate a, he a ram pekah hian Sangha dil lian tak laih fel tawh niin kumin atanga Sangha dah hman tum a ni.
Pu Hmangaihthanga hi pa tlawmngai leh mi harsate lainat thintu niin a buh thar atangin Mosia Zem a siam thin a, chutah chuan a buh tharchhuah zawng zawngte atanga hmun thuma thena hmun hnih vel dahin mi harsa zawkten an mamawh/duh hun huna an ruh chhuah ve mai theih turin a phal rai thin a ni.
Vawiina National Day leh Jubilee hmannaah hian amah a kal remchan theih loh avangin a aiawhin a fapa Malsawmdawngliana’n a zu dawng a ni.
Serchhip DFDO Pi Zonuntluangi chuan, Serchhip District ah Fisheries Department in 2011 atanga Office nei tana hma an lak chhoh chhung hun reiloteah hetiang hlawhtlinna an chang thei chu lawmawm a tih thu a sawi a. Hei aia nasa zawka hma lak chhoh zel an tum thu sawiin Pu Hmangaihthanga a lawmpui tak zek tih a tarlang a ni. -DIPR
Post a Comment