LUNGLENG LAL KHAMLIANA SAILO CHANCHIN ZIAKNA LEHKHABU KS THANGA'N A TLANGZARH

"Thuziaktute hi kan khawtlang, kan ram leh kan hnam rohlu takte an ni" - KS Thanga, Minister 

Agriculture Minister Pu KS Thanga chuan thuziaktute hi kan khawtlang, kan ram leh hnam rohlu takte an ni a, an inpekna leh taimakna rah hi thangthar ten an la tangkaipui zel dawn a ni," a ti.

He thu hi Pu KS Thanga chuan vawiin (Dt. 24.08.2018)-a a pisa-a neih R. Lalhlimpuia ziak 'Lungleng Lal Khamliana sailo chanchin' lehkhabu a tlangzarhna hunah a sawi a. Lungleng tlangval ngeiin an khaw Lal Khamliana Sailo chanchin chik taka chhui a, khawvel hriata a pho chhuak chu a lawmawm takzet a ni. Pu Khamliana Sailo hi Mizo Lalte zingah a ropui leh fing berte zinga mi a ni a, British min awp thintu bawrhsapte pawhin an biak rawn ber thin a ni, a ti.


LEHKHAB chhuak tharLehkhabu tlangzarhtu Pu KS Thanga chuan tunlai khawvel thiamna nasa tak thang chho mekah hian ziak mite dinhmun a hmuh dan sawiin, "Electronic media khawvel ah hian thuziakte hi TV leh Computer bakah kan mobile handset ah te hian kan chhiar nasa ta em em a, amaherawhchu chu chuan lehkhabu hlutna hi a ti nep chuang reng reng lova. Thu leh hla ziaktute an awm zel loh chuan chhiar tur hi a awm thei chuang dawn lova. Chuvangin, khawvel awm chhung chuan ziak mite hi in pawimawh reng dawn a ni" a ti.



Lehkhabu ziaktu R. Lalhlimpuia te khua Lungleng bialtu MLA Pu KS Thanga chuan a bial chhung mi ziak mi tha tak an awm chu lawmawm a tih thu a sawi a, history zir mite leh Mizo Lalte chanchin ngaihventute tan lehkhabu rawn tlak tak a nih a beisei thu a sawi a. Vawiin thlenga Lungleng Lal In tha taka humhalh leh enkawl a la ni chu a lawmawm a, zin mite leh zirlaiten an tlawh fo thin hian Lungleng khua a tihlu a ni, a ti bawk.

Vawiina lehkhabu tlangzarh inkhawm hi Pu Lalhmachhuana Zofa chuan a kaihruai a, lehkhabu thlirlawktu Pu KC Vanlalruata chuan, "Ram nitla seng lova roreltu Kawmpinu (British) lo lianin Zoram an rawn awp hnua - lalna tlang an pek khawpa anmahni lo tanpuitu leh thian tha tling, Khamliana Sailo, Lungleng lal hi kha tih lai hun ah na na na kha chuan Mizo lal zinga arsi eng pawl tak a ni a. A kut chhuak leh sulhnu tam tak a neih te, mi tangkai leh mi hmasa a nihnaah te hian Zofate tan theihnghilh phal chi a ni dawn lo," a ti.


Tlangzarh inkhawmah hian lehkhabu ziaktu thian tha leh chhungte bakah Lungleng khawtlang hruaitu thenkhatte an tel a, thusawitute chuan bial mite ngaihsak em em thintu Pu KS Thanga hnenah lawmthu an sawi a ni.

Lungleng Lal Khamliana Sailo chanchin lehkhabu hi phek 164 a chhah, Gilzom Offset chhut niin Rs. 100/- in lehkhabu dawr hrang hrang leh Synod Bookroom-ah te zawrhchhuah a ni.

Source: Zet Dee A Chhangte

Post a comment

Powered by Blogger.